Կորոնավիրուսի հետևանքով ստեղծված իրավիճակին պետք է վերաբերվել առավելագույն հանդարտությամբ․ վարչապետ

Մեր կարծիքով` Հայաստանի տնտեսության համար այս ժամանակաշրջանը ոչ միայն խնդիրներ կստեղծի, այլև կբացի հնարավորություններ: Այս մասին իր ֆեյսբուքյան ուղիղ եթերում ասաց վարչապետ Նիկոլ Փաշինյանը՝ անդրադառնալով կորոնավիրուսի պատճառով ստեղծված իրավիճակին:

«Համաշխարհային տնտեսության մեջ տեղի են ունենում էական խմորումներ, որոնք կարող են պրոբլեմներ առաջացնել բոլոր երկրների տնտեսությունների համար: Անխուսափելիորեն համաշխարհային շուկայում վերադասավորումներ են տեղի ունենալու և կարծում ենք, որ այդ վերադասավորումները ՀՀ տնտեսության համար բացելու են նաև նոր հնարավորություններ: Չնայած, պարզ է, որ կարող են առաջանալ նաև խնդիրներ»,- ասաց նա:

Վարչապետի խոսքով՝ կորոնավիրուսի հետևանքով ստեղծված իրավիճակին պետք է վերաբերվել առավելագույն հանդարտությամբ. «Պետք է արձանագրենք, որ կորոնավիրուսի ձախորդ օրերը ձմռան նման, ինչպես մեր դասականն է ասում՝ կուգան ու կերթան: Շատ կարևոր է, որ այս իրավիճակից մենք դուրս գանք ուժեղացած և ոչ թե թուլացած»:

Հիշեցնենք, որ ՀՀ-ում այս պահի դրությամբ 6 անձի մոտ է հաստատվել կորոնավիրուս, իսկ 88 անձ մեկուսացված է։