Կասկած կա, որ Վրաստանը կորոնավիրուսի պատճառով կփակի Լարսը

Վրաստանի վարչապետ Գեորգի  Գախարիան հայտարարել է, որ անհրաժեշտության դեպքում իշխանությունները պատրաստ են փակել սահմանները ցանկացած երկրի հետ, որոնք կորոնավիրուսի տարածման տեսանկյունից վտանգ կներկայացնեն: Այդ մասին նա նշել է՝ պատասխանելով «Բլումբերգի» լրագրողի հարցին, թե կփակի՞ Վրաստանը իր սահմանները Ռուսաստանի հետ, որտեղ, ըստ լրագրողի, մոլեգնում է կորոնավիրուսը, թեպետ իշխանությունները դա թաքցնում են:

«Այս դեպքում միայն Ռուսաստանի մասին խոսք լինել չի կարող: Մենք խոսում ենք գլոբալ խնդրի և սահմաններ չճանաչող վիրուսի մասին: Մեզ համար գլխավորը մեր քաղաքացիների անվտանգությունն է: Ռիսկերը նվազեցնելու համար մենք սահմանին միջոցներ կձեռնարկենք՝ ցանկացած երկրի հետ կապված»,- հայտարարել է նա:

Ռուսաստանի Դաշնության և Վրաստանի Հանրապետության սահմանին գտնվում է Վերին Լարսի անցակետը, որի միջոցով էլ իրականացվում են նաև Ռուսաստանի ու Հայաստանի միջև բեռնափոխադրումները: