43-ամյա կնոջը սպանած երիտասարդը գրանցված է եղել հոգեկան առողջության կենտրոնում․ մանրամասներ դեպքից

Գյումրիում մարտի 5-ին կատարված աղմկահարույց սպանության դեպքով կալանավորված 28-ամյա երիտասարդը գրանցված է եղել Գյումրու հոգեկան առողջության կենտրոնում: Նաեւ նախկինում եղել է 4 անգամ դատապարտված՝ 2 անգամ հափշտակության, 1 անգամ սպանության սպառնալիքի, 1 անգամ անձին մարմնական վնասվածք հասցնելու համար (մարմնական վնասվածք ստացողը 43-ամյա Մարինեն չի եղել): Այս մասին այսօր լրագրողների հետ զրույցում ասաց Շիրակի մարզի դատախազ Կարեն Գաբրիելյանը: Գրում է Armtimes.com-ը։

Դատախազի խոսքով՝ մարտի 5-ին ծեծի հետեւանքով մահացած 43-ամյա Մարինեն, պարզվում է, առաջին անգամ չէ, որ այդ երիտասարդի  կողմից բռնության է ենթարկվել: 2016 թվականին կրկին միջադեպ է եղել, կինը սկզբում բողոք է ներկայացրել ոստիկանություն, հարուցվել է քրեական գործ ՀՀ ՔՕ 113 հոդվածի հատկանիշերով (Դիտավորությամբ առողջությանը միջին ծանրության վնաս պատճառելը): Քրեական գործը, սակայն, ըստ դատախազի, հաշտության հիմքով կարճվել է: Տուժողը բողոքը ետ է վերցրել, իսկ այդ պայմաններում անձին մեղադրանք առաջադրելու հիմք առկա չի եղել:

Եթե պարզվի, որ այդ դեպքից բացի, նախկինում կրկին բռնության դրսեւորումներ են եղել, եւ ոստիկանությունն օրենքով նախատեսված կարգով չի արձագանքել դրանց, դատախազը խոստացավ, որ քրեաիրավական գնահատական կտրվի ոստիկանության աշխատակիցների արարքին:

Ենթադրյալ հանցագործը մինչ այս պահը ցուցմունք չի տվել, փորձաքննությունից շարունակում է հրաժարվել, առաջադրված մեղադրանքը չի ընդունում, իրենց մեղավոր չի ճանաչում: Ըստ դատախազի, սակայն, նրան մեղադրանք առաջադրելու բավարար հիմքեր ունեն: «Հանցագործություն կատարածի մայրը, հայրը հարցաքննվել են եւ տվել են այնպիսի ցուցմունքներ, որոնք վկայում են, որ նշված անձը դիտավորությամբ մարմնական վնասվածքներ է հասցրել տուժողներին: Դեպքից հետո է կատարողը զանգել, մորը կանչել: Մայրը գնացել է եւ տղան մոր ներկայությամբ խոստովանել է կատարածի մասին»,-ասաց դատախազը:

Գործում առկա նախնական տեղեկատվությամբ, սկզբում մայրն է ծեծի ենթարկվել: Վիճաբանությունը ծագել է խանդի հողի վրա: Աղջիկը միջամտել, թույլ չի տվել, որ տղամարդը մորը հարվածի, ինչի հետեւանքով նա եւս ստացել է մարմնական ծանր վնասվածքներ: Դատախազն ասաց երկուսին էլ տղամարդը բռունցքներով է հարվածել: Վերջինիս ձեռքերի համապատասխան հատվածներում հայտնաբերվել են մարմնական վնասվածքներ: «Դեպքի վայրում չենք հայտնաբերել այնպիսի հետքեր ու առարկաներ, որոնց վրա առկա լինեին նմուշներ, մազեր որոնք թույլ կտային ենթադրել, որ հարվածները գուցե դրանցով են հասցվել»,-պարզաբանեց Կարեն Գաբրիելյանը:

Հիշեցնենք, որ մարտի 5-ին՝ ժամը 14:50-ին, Գյումրիի Պռոշյան 14 հասցեում հայտնաբերվել էր 43-ամյա կնոջ դի: Նույն տնից մարմնական վնասվածքներով հիվանդանոց էր տեղափոխվել 2007 թվականին ծնված երեխա:

Մանրամասները սկզբնաղբյուր կայքում։