Մեկ օրում կորոնավիրուսի հետևանքով զոհերի թիվն աճել է 31%-ով
Իտալիայի կառավարությունը կարգադրել է ամբողջ երկրում փակել բոլոր խանութները, բարերն ու ռեստորանները, քանի որ երկրում կորոնավիրուսի հետևանքով զոհերի թիվը վերջին 24 ժամում աճել է 31 տոկոսով՝ հասնելով 827-ի։ Այս մասին հայտարարել է Իտալիայի վարչապետ Ջուզեպպե Կոնտեն։
«Ես բարձր եմ գնահատում Ձեր ջանքերը, սակայն եկել է հաջորդ քայլն անելու ժամանակը։ Մենք դադարեցնում ենք ողջ կոմերցիոն գործունեությունը, փակում վաճառքի կետերը, բացառությամբ մթերային խանութների ու դեղատների»,-հայտարարել է Կոնտեն։
Աշխատանքը կշարունակեն միայն բանկերը, փոստը, ապահովագրական և ֆինանսական ընկերությունները։ Հասարակական տրանսպորտը ևս կշարունակի գործել։
«Մենք բոլորս պետք է ինչ-որ բան զոհաբերենք հանուն Իտալիայի բարօրության և դա պետք է հենց հիմա անենք: Ահա թե ինչու որոշեցի ավելի վճռական և խիստ միջոցներ ձեռնարկել»,- հայտարարել էր Իտալիայի վարչապետը՝ հավելելով, որ Իտալիան «կշրջափակվի» բոլոր կողմերից:
