Կացարան չունեցող տարեցների համար Հայաստանում փոքր տներ կկառուցվեն

Հայաստանում կացարան չունեցող տարեցների համար կկառուցվեն նոր ու հարմարավետ փոքրիկ տներ։ ՀՀ կառավարությունն ու «Avondglans» հիմնադրամի միջև պայմանագիր է կնքվել, ըստ որի` հիմնադրամը 100 հազար եվրո կտա աշխատանքի և սոցիալական հարցերի նախարարությանը` համայնքային փոքր տների կառուցման և կահավորման աշխատանքների իրականացման համար։

«Ծրագիրը կյանքի կկոչվի երեք փուլով, նախ` կիրականացվեն տան գնման հետ կապված աշխատանքները, հետո նախագծային և վերանորոգման աշխատանքներ կտարվեն։ Վերջում ձեռք բերված տները նաև կկահավորվեն»,–ասաց ՀՀ աշխատանքի և սոցիալական հարցերի նախարարի տեղակալ Սմբատ Սաիյանը։

Նրա խոսքով` տարեցների փոքր տունը նոր տիպի կառույց է, որն էականորեն տարբերվելու է այսօր գործող խնամքի տներից: Յուրաքանչյուր տանը կապրեն ոչ ավել, քան երկու տարեց, իսկ նրանց սենյակները կլինեն ոչ պակաս, քան 6 քմ։ Այժմ, ի դեպ, տարեցների խնամքի կենտրոններում 1 սենյակում բնակվում են 2-7 անձ, յուրաքանչյուր սենյակի մակերեսը կազմում է 5 քմ։

Օրենքի նախագծում նշվում է, որ փոքր տան բնակիչներն իրենք են կատարելու տան մաքրության, գնումներ կատարելու, կերակուր պատրաստելու, այգում աշխատելու և այլ աշխատանքները։ Իհարկե, իրենց ցանկությամբ և սոցիալական օգնականի աջակցությամբ:

Բացի այդ, փոքր տան բնակիչներն ապահովվելու են ոչ միայն կացարանով, անհրաժեշտ կահույքով, այլ նաև անկողնային պարագաներով, անկողնային և անձնական սպիտակեղենով, հագուստով, կոշկեղենով, օրը առնվազն երեքանգամյա սննդով, համապատասխան տնտեսական և հիգիենիկ պարագաներով, աշխատանքային զբաղվածությամբ (իրենց ցանկությամբ):

Հիշեցնենք, որ ՀՀ–ում գործում է տարեց և/կամ հաշմանդամություն ունեցող (այդ թվում՝ հոգեկան առողջության կամ մտավոր խնդիրներ ունեցող) անձանց շուրջօրյա խնամքի ծառայություն մատուցող 12 հաստատություն, որոնցից 7-ը՝ ոչ պետական: Բոլոր հաստատություններում շուրջօրյա խնամքի ծառայություններ են ստանում 1390 մարդ (որից 180–ը՝ ոչ պետական հաստատություններում), իսկ տնային պայմաններում սպասարկվում են ավելի քան 3800 մարդ։ Ցերեկային կենտրոններ են հաճախում շուրջ 2000 տարեց: