Էսօր ես կենդանի եմ. կարմիր թիկնոցներով և սև դիմակներով ակցիա՝ կառավարության դիմաց
ՁԻԱՀ-ի կանխարգելման հանրապետական կենտրոնի աշխատակիցները, ՄԻԱՎ-ով ապրող և այնտեղից աջակցություն ստացող մի քանի քաղաքացի հավաքվել էին կառավարության շենքի առջև։ Նրանք դեմ են, որպեսզի ՁԻԱՀ-ի կանխարգելման կենտրոնը միանա «Նորք» ինֆեկցիոն կլինիկական հիվանդանոցին։
«Էսօր ես կենդանի եմ, այսօր ես այդ մարցկանց հետ ճանապարհ եմ անցում, արդեն 9-րդ տարին է։ Դրա համար ես մտավախություն ունեմ։ Եթե նախարարությունն ասում է, որպեսզի ավելի բարելավի էդ ամեն ինչը, ուրեմն թող ասեն՝ ինչն է պակաս, ինչ-որ բան լավ սարքելու համար, ուրեմն վատը պիտի ասեն չէ՞, ինչն է վատը»,- ասաց 9 տարի ՄԻԱՎ–վարակակրի կարգավիճակով կենտրոնում բուժում ստացող Արման Ավչյանը:
«Դրական մարդկանց հայկական ցանց» հասարակական կազմակերպության ղեկավար Անահիտ Հարությունյանը լրագրողների հետ զրույցում նշեց, որ հավաքին ներկա ՄԻԱՎ-ով ապրող մարդիկ են զանգել իրենց և անհանգստություն հայտնել կենտրոնի միավորման կապակցությամբ և ցանկացել են կանգնել իրենց բժիշկների կողքին։
«2003 թվականից մենք ունենք ազգային ծրագիր, որի տակ դրված է հստակ վիճակագրություն․ որ խոցելի խմբերում վարակվածությունը եղել, ինչից է սկսվել, որտեղ են ռազմավարական ուղղություններ եղել։ 2005-ից սկսած բոլոր հիվանդները, որոնք ունեն բուժման կարիք, բուժում են ստացել։ Մինչև էս օրը ոչ մի անգամ ընդհատում չի եղել»,- նշեց նա։
Հավաքին մասնակցում էին նաև այլ ՄԻԱՎ-վարակակիրներ, որոնք կրում էին կարմիր թիկնոց և սև դիմակ։
