Եղվարդի ծննդատան հիմնանորոգումների աշխատանքների մի մասը լինելու է սեփական խնայողությունների հաշվին. մարզպետ

Եղվարդի ծննդատունը չի փակվելու, այն գործելու է, նախատեսված են վերանորոգման, վերազինման աշխատանքներ: «Արմենպրես»-ի մամուլի սրահում հրավիրված ասուլիսի ժամանակ ասել է Կոտայքի մարզպետ Ռոմանոս Պետրոսյանը:

«Ծննդատան շենքի չափագրման աշխատանքներն արդեն ավարտվել են: Ծննդօգնության բաժանմունքը, ծնարանը, կանանց կոնսուլտացիոն բաժինը, ամբողջ նախասրահը վերանորոգելու ենք ժամանակակից չափորոշիչներով, վերազինելու ենք ամբողջական գույքով: Առաջիկայում օրենքով սահմանված կարգով կհայտարարվի մրցույթ, կկատարվի կառուցապատող ընկերության ընտրություն, աշխատանքները կմեկնարկեն կապալառուի հետ պայմանագիրը կնքվելուց հետո»,-ասաց Ռոմանոս Պետրոսյանը:

Մարզպետը տեղեկացրեց, որ աշխատանքների մի մասը լինելու է սեփական խնայողությունների հաշվին: Դիմելու են նաև բարեգործների, Սփյուռքի մեր հայրենակիցների օգնությանը՝ հատկապես առանձին սարքավորումների վերազինման համար:

Հիշեցնենք, որ դեռ տարեսկզբին` հունվարի 13-ին, Եղվարդի ծննդատան աշխատակիցները բողոքի ակցիա իրականացրին հիվանդանոցի բակում: Բողոքի պատճառը  ՀՀ առողջապահության նախարարության որոշմումն էր, ըստ որի  ՀՀ մարզային մի շարք բուժհաստատությունների ֆինանսավորումը դադարեցվում էր, որի հետեւանքով մարզային մի շարք ծննդատներ փակվում էին։