Ի ծնե սրտի հիվանդություն ունեցող 5-ամյա Անգելինայի վիրահատության համար անհրաժեշտ 100 հազար դոլար գումարի 70 տոկոսը հավաքվել է, մնացած 30 հազար դոլարը կտրվի պետական բյուջեից։ Այս մասին «Ֆեյսբուք»-ի իր էջում գրել է ՀՀ առողջապահության նախարար Արսեն Թորոսյանը։ 

«Տեղեկացա, որ հավաքվել է փոքրիկ Անգելինայի սրտի վիրահատության գումարի 70%-ը։

Մնացած 30.000$-ը իմ հրամանով կտրվի պետական բյուջեից։

Վիրահատությունը կարվի Նորք-Մարաշ ԲԿ-ում մոտակա 1-2 օրվա ընթացքում։ Նման վիրահատություն Հայաստանում կատարվելու է առաջին անգամ։

Առողջություն եմ ցանկանում հրաշք փոքրիկին»,- գրել է Թորոսյանը։ 

Ավելի վաղ AuroraNews.am-ն անդրադարձել էր փոքրիկ Անգելինայի դեպքին: Անգելինան ի ծնե ունի սրտային հիվանդություն՝ կարդիոմիոպաթիա․ վերջերս նրա առողջությունը կտրուկ վատթարացել է։ Փոքրիկ գտնվում է Նորք-Մարաշ բժշկական Կենտրոնում և  պայքարում է կյանքի համար։ Նրան շտապ անհրաժեշտ է «արհեստական ձախ փորոք» կոչվող սարքը, որն առաջին անգամ կտեղադրվի Հայաստանում Անգելինայի հայրը զինվորական է, մայրը հղի է և սպասում է երեխայի մոտալուտ ծնվելուն։