Մեկը կարա՞ ասի՝ ինչ կապ ունի հանրաքվեն սահմանամերձ շրջաններում ապրող մարդկանց կյանքի հետ. Էդմոն Մարուքյան

Ազգային ժողովի «Լուսավոր Հայաստան» խմբակցության պատգամավորներն այսօր՝ փետրվարի 9-ին, ներկայացնում են իրենց օրենսդրական գործունեության տարեկան հաշվետվություն։   Խմբակցության ղեկավար Էդմոն Մարուքյանը հայտնեց, որ 2019 թվականի ընթացքում իրենք ներկայացրել են 66 օրենսդրական նախագծեր, որոնցից ընդունվել է 15-ը, մնացածը մերժվել են։ 

Մարուքյանն ասաց, որ վերջին հարցումների տվյալներով՝ Լուսավոր Հայաստանը ճանաչվել է ամենաշատ մարզային խնդիրները բարձրացնող կուսակցություն։ 

Հայաստանի Հանրապետության սահմանամերձ շրջաններում ապրող մարդիկ կյանքի որակ չունեն։  «Մեր երկիրն անդադար այնպիսի օրակարգերի մեջ է, որը կապ չունի այս մարդկանց կյանքի հետ։ Մեկը կարա՞ ասի՝ ինչ կապ ունի հանրաքվեն այս մարդկանց կյանքի հետ։ Պետությունն այս հարցերը հասցեագրո՞ւմ է»,-նշեց նա։ 
«Ես, որ անկախ պատգամավոր էի, 5 տարի պայքարում էի, ասում էի՝ ժողովուրդ ջան, Երևանին շատ եք փող տալիս, կյանքի որակն այստեղ շատ բարձր է, եկեք այս փողից մի քիչ տանք մարզերին, կյանքի որակն այնտեղ բարձրացնենք, դրա արդյունքում մարդիկ իրենց գյուղերը չեն լքի, որովհետև ռազմավարական անվտանգության հարց է մարդկանց գյուղերում պահելը, պետությունը դրա մասին պետք է մտածի։ Գյուղերում մեկը ուզում է գնա բժշկի, գալիս է Երևան, ուզում է լավ կրթություն ստանա, գալիս է Երևան, ուզում է ժամանցի գա, էլի գալիս է Երևան, այսինքն կյանքի որակի հետ կապված ծառայություններ գյուղում մարդը չի ստանում, իր եղած երկու կոպեկն էլ բերում այստեղ է ծախսում։ Հետո ասում են՝ հա, փողերը ստեղ ենք հավաքել, դրա համար պետք է հետ տանք։ Որ ասում են՝ մարդը չի աշխատում, պետք է աշխատի և աշխատանքը նրան հանի աղքատությունից, հիմա էս մարդկանց հողների վրա կրակում են, ինքն ուզում է աշխատի, հիմա ոնց պետք է աշխատի։ Պետությունը հիմա պետք է աջակցի այս մարդկանց, որ իրենց շարունակեն այդտեղ ապրել, որ զինվորը կրակի, իմանա, որ էս մարդիկ իր հետևում ապրում են, ոչ 10 տուն ա, այլ 100, հազար տուն»,-ասաց նա։