Խորհրդարանը վերսկսեց իր աշխատանքն արտահերթ ռեժիմում: Օրակարգում Սահմանադրական փոփոխությունների հարցն է: Քվորումն ապահովված է: Գրանցվել է 110 պատգամավոր:

ԱԺ «Լուսավոր Հայաստան» խմբակցության ղեկավար Էդմոն Մարուքյանը վարման կարգով ելույթ ունենալով՝ նշեց. պետաիրավական հանձնաժողովը չի տվել հատուկ ընթացակարգի մասին եզրակացություն, և առանց դրա մտնում են Սահմանադրական փոփոխությունների հատուկ ռեժիմի մեջ:

«Սա բացթողում է և խախտում, պետք է պետաիրավականի նիստ արվի»,- ասաց նա:

ԱԺ նախագահ Արարատ Միրզոյանն արձագանքեց.

«Մեր կանոնոնակարգ օրենքը նախատեսում է դեպքեր, երբ քննարկումն անցկացվում է առանց գլխադասային հանձնաժողովի եզրակացության»:

ԲՀԿ-ական պատգամավոր Միքայել Մելքումյանը վարման կարգով նշեց, որ ԱԺ կանոնակարգ օրենքով սահմանված է Սահմանադրության փոփոխության նախաձեռնությունը ԱԺ քննարկման ներկայացնելու և նախագիծը շրջանառության մեջ դնելու կարգը: Նա մասնավորեցրեց՝ գրությունը ստանալուց հետո երեք աշխատանքային օրվա ընթացքում է դրվում շրջանառության մեջ, այն սովորական օրենքների ռեժիմով չէ:

«Ես դա արել եմ»,- ասաց Միրզոյանը:

Հիշեցնենք, այսօր առավոտյան արտահերթ նիստը չկայացավ, քանի որ, ինչպես տեղեկացրել է ՀՀ ԱԺ նախագահ Արարատ Միրզոյանը, «ԱԺ կանոնակարգ» սահմանադրական օրենքի 68-րդ հոդվածի 1-ին մասի 7-րդ կետի համաձայն` նախաձեռնողն այսօր առավոտյան հետ է կանչել արտահերթ նիստի օրակարգում ընդգրկված օրենսդրական նախաձեռնությունները: