ՌԴ նորանշանակ վարչապետ Միխայիլ Միշուստինը մոր կողմից հայկական արմատներ ունի

ՌԴ նորանշանակ վարչապետ Միխայիլ Միշուստինի մասին կենսագրական տվյալներում նշվում է, որ վերջինս մոր կողմից արմատներով հայ է: Ծնվել է 1966 թվականին Մոսկվայում: Ռուսական Woman.ru կայքի տվյալներով ՌԴ նորանշանակ վարչապետի արմատները Մեղրաձոր գյուղից են: Կայքը անգամ նշել է գյուղի հին անվանումը` Թայչարուխ: 

Մեղրաձորը շատ հին բնակավայր է: Այն Թեժառույք կոչվել է անտիկ ժամանակներից մինչև 17-րդ դարի սկիզբը՝ Մարմարիկ-Մեղրաձոր արագահոս գետերի դելտայում գտնվելու համար։ Այսինքն, գյուղի հին անունը կարելի է ստուգաբանել որպես «Թեժ առու»: 

Իսկ ահա Թայչարուխ կոչվել է 17-րդ դարի կեսերից մինչև 1946թ։ Պարսից Աիրգունա խանը մի քանի արշավանք է կատարել և տեղի մահմեդական  բնակչությանը բռնի կերպով բնակեցրել մի քանի համայնքներում, այդ թվում՝ Թեժառույքում: 

Այստեղ հաստատվել են թուրք կարակալպակներ, որոնք էլ նոր բնակավայրին տվել են իրենց հնչմամբ Թայչարուխ անունը՝ «Թայ»՝ զույգ և «Չայ»՝ գետ բառերի բարդացումից, որ նշանակում է զույգ գետերի արանքում գտնվող բնակավայր։

Արդեն Մեղրաձոր անունով գյուղը հիմնադրվել է 1830 թվականին և հայերով կրկին վերաբնակեցվել նույն թվականի մայիսին: