Արգելվելու է ճայթուկների և պայթուցիկների վաճառքը. Sputnik Արմենիա
ՀՀ առողջապահության նախարարությունն օրենքի նախագիծ է մշակել, ըստ որի` այսուհետ արգելվելու է ճայթուկների վաճառքը։ Sputnik Արմենիայի հետ զրույցում այս մասին հայտնեց ՀՀ առողջապահության նախարարության իրավաբանական վարչության պետ Աննա Մկրտումյանը։
Նախարարությունը նախատեսում է փոփոխություններ կատարել «Տեխնիկական անվտանգության ապահովման պետական կարգավորման մասին» ՀՀ օրենքում։
Նրա խոսքով` ճայթուկ ասելով` հաշվի են առնվելու այն բոլոր պայթուցիկները, որոնք թելային գլանակ ունեն և որոնց ծայրին այրման համար հատուկ քսուկ կա։ Եթե օրենքի ընդունումից հետո որևէ խանութ ճայթուկ վաճառի` կպարտավորվի նվազագույն աշխատավարձի երկուհարյուրհիսնապատիկի չափով տուգանք վճարել։
Բացի այդ, ըստ Մկրտումյանի, տեխնիկական և հատուկ նշանակության հրավառությունները կիրականացվեն պետական և տեղական ինքնակառավարման մարմինների պատվերի հիման վրա։ Մասնագետը հայտնեց` ազատ վաճառքում կլինեն միայն կենցաղային նշանակության հրավառությունները, որոնց հետ վարվելը չի պահանջում հատուկ գիտելիքներ։ Պարզ ասած`դրանք ձեռքի մեջ պայթելու «հնարավորություն չունեն»։
Առողջապահության նախարարության մշակած օրենքի նախագիծն այժմ հանրային քննարկման է դրված։ Այն նաև ուղարկել են պատկան մարմիններին` կարծիք ստանալու համար։ Նախատեսվում է, որ մինչև 2020թ.–ի տարեվերջ օրենքն ընդունված կլինի։
Հիշեցնենք, որ տոնական օրերին` դեկտեմբերի 31-ից հունվարի 7-ն ընկած ժամանակահատվածում, հանրապետության բժշկական կենտրոններ են դիմել պայթուցիկներից և հրավառություններից տուժած 95 անձ, որոնցից 40–ն անչափահաս են եղել։
Առավել մանրամասն՝ սկզբնաղբյուր կայքում
