Դիլիջան քաղաքում գործող ռեստորանային համալիրներից մեկի տարածքում շանը կրակելու փաստի առթիվ հարուցած քրեական գործի շրջանակում Դիլիջանի ազգային պարկի տնօրեն Սուրեն Աղաջանյանին, որը նաեւ հիշյալ ռեստորանի սեփականատերն է, մեղադրանք է առաջադրվել ՀՀ քրեական օրենսգրքի 258.2-րդ հոդվածի 1-ին մասով (կենդանու նկատմամբ դաժան վերաբերմունքը):

Այս մասին «Հայկական ժամանակ»-ի հարցին ի պատասխան՝ տեղեկացրել են Քննչական կոմիտեի տեղեկատվության եւ հասարակայնության հետ կապերի բաժնից:

Աղաջանյանի նկատմամբ որպես խափանման միջոց է ընտրվել չհեռանալու մասին ստորագրությունը:

Հիշեցնենք, որ դեպքը տեղի էր ունեցել դեկտեմբերի 1-ին: Օգտատերերից մեկը ֆեյսբուքյան իր էջում գրել էր, որ 4 ականտեսի աչքի առաջ Դիլիջանի «Գետափ»-ում կրակել են այնտեղ բնակվող շան վրա: Նա ահազանգել էր ոստիկանություն, որտեղ էլ սկսել էին նյութեր նախապատրաստել: Ավելի ուշ Գլխավոր դատախազի խորհրդական Գոռ Աբրահամյանը տեղեկացրել էր, որ ոստիկանությունում նախապատրաստված նյութերը Դատախազությունից ուղարկվել են ՀՀ ՔԿ Տավուշի մարզային քննչական վարչության Դիլիջանի քննչական բաժին՝ քրեական գործ հարուցելու, նախաքննություն կատարելու և այդ շրջանակներում անհետաձգելի մի քանի քննչական գործողություններ իրականացնելու ցուցումով: Դեպքի առթիվ դեկտեմբերի 3-ին հարուցվել էր քրեական գործ: Նշեք, որ ռեստորանի սեփականատերը ներողություն է խնդրել, այնուհետեւ հայտնել, որ դա իր շունն է եղել, եւ նրան սպանել են, որովհետեւ վերջին օրերին մի քանի անգամ հարձակվել էր մարդկանց վրա: