Ինչու են ոստիկաններն այցելել Սարհատ Պետրոսյանի բնակարան․ նոր մանրամասներ

Ոստիկանության 6-րդ վարչության աշխատակիցները այցելել են Կադաստրի պետական կոմիտեի նախկին պետ Սարհատ Պետրոսյանի բնակարան՝ պարզաբանման հրավիրելու համար: Այս մասին տեղեկացնում են Ոստիկանության լրատվական բաժնից։

Նշենք, որ Սարհատ Պետրոսյանը Newarmenia.am-ին տված հարցազրույցում ասել է, որ ոստիկանության աշխատակիցները եկել էին մի կազմակերպության հայտարարության հիմքով, թե Սարհատ Պետրոսյանի հայտարարության մեջ պատժելի գործողություններ կան.

Պետրոսյանը  ոստիկանություն է հրավիրվել ՀՀ փոխվարչապետի խորհրդական, քաղաքաշինության կոմիտեի նախկին նախագահ Ավետիք Էլոյանի մասին հայտարարությունների համար: 

Հիշեցնենք՝ ավելի վաղ նա հայտարարել էր, թե Ավետիք Էլոյանը ներգրավված է «կոռումպացվածության հասնող թայֆայականության» մեջ: ետրոսյանը ներկայացրել էր, որ Ավետիք Էլոյանը 2012 թվականին եղբոր՝ Զարեհ Էլոյանի հետ ԱՄՆ-ում բացել է «Eloyan Architects» նախագծային կազմակերպությունը, որի պաշտոնական կայքում կա միայն մեկ բնակարանի ինտերիերի նախագիծ Հայաստանում:

Նրա խոսքով՝ «Eloyan Architects»-ն այժմ ներգրավված է նաև նոր ֆուտբոլային համալիրի, Դալմայի տարածքում բազմահարկ բնակելի թաղամասի և մի շարք այլ նախագծերում: «Դրան ավելացնենք հանրահայտ 70 հարկանի շենքի նախագիծը, որը, ինչպես ներկայացվում է հարցազրույցում, պատվիրվել է 2017-ի վերջին։ Չնայած այս պնդումն արժանահավատ չէ, սակայն եթե կարելի է ապացուցել, որ դա պատվիրվել է մինչ նշանակումը, ապա այս նախագծի մասով կարծում եմ՝ կկարողանանք հանգիստ լինել (ավելին՝ ներողություն խնդրել), բայց, միևնույնէ, մնում է այն հարցը, թե ինչպե՞ս է մեր լավագույն ինտերիեր դիզայներներից Զարեհ Էլոյանը շարունակելու այս աշխատանքն առանց «փորձառու» Ավետիք Էլոյանի»,- ասել էր Պետրոսյանը:

Ի պատասխան Էլոյանը հայտարարել էր, որ պատրաստվում է դատական հայց ներկայացնել Պետրոսյանի դեմ, ինչը եւ արել է: