Կառավարությունն առաջարկում է փոփոխություն կատարել գործող օրենսդրությունում և «օդի հարկից» ազատել ավիաթռիչքների բոլոր այն նոր ուղղություններով, որոնցով թռիչքներ չեն կատարվել վերջին 1 տարվա ընթացքում։ Այս որոշումն ընդունվեց կառավարության այսօրվա նիստում։

Վարչապետը հիշեցրեց, որ երբ RyanAir ընկերության Հայաստան մուտքի մասին հայտարարվեց, խոսակցություններ եղան, որ այդ ընկերությանը արտոնություն է տրվում։

«Արտոնություն չի տրվում RyanAir-ին։ Մենք հրավիրում ենք աշխարհի, առանց բացառության, բոլոր ավիաընկերություններին։ Որոշ բացառություններ կլինեն` կապված մեր ազգային անվտանգության շահերի հետ», – ասաց Փաշինյանը։

Վարչապետն ասաց, որ արտոնությունը կոնկրետ այդ ընկերության հետ կապված է այնքանով, որքանով հիմա միայն այդ ընկերությունն է որոշել օգտվել դրանից։ Բայց ցանկացած ընկերություն, ըստ Փաշինյանի, նույնպես կարող է օգտվել, եթե ցանկանա մտնել Հայաստանի շուկա։