Արդարադատության նախարար Ռուստամ Բադասյանի եկամուտները մեկ տարվա ընթացքում եռապատկվել են. Armdaily.am

«Հայտարարագիր» շարքում այս անգամ կներկայացվի ՀՀ Արդարադատության նախարար Ռուստամ Բադասյանի ունեցվածքը, գրում է Armdaily.am-ը:

Ով է Ռուստամ Բադասյանը

Բադասյանը ծնվել է 1991 թվականի հունվարի 27-ին, Երևանում։
2011 թվականին ավարտել է Երևանի պետական համալսարանի Իրավագիտության ֆակուլտետը՝ բակալավրի աստիճանով։ 2013 թվականին ավարտել է Հայաստանի գիտությունների ազգային ակադեմիայի Գիտակրթական միջազգային կենտրոնի Իրավագիտության ֆակուլտետը՝ մագիստրոսի աստիճանով։ 2015 թվականին ավարտել է ՀՀ Փաստաբանական դպրոցը և ստացել փաստաբանական գործունեության արտոնագիր։

2012-2013 թվականներին որպես առաջատար մասնագետ աշխատել է ՀՀ կառավարությանն առընթեր պետական եկամուտների կոմիտեի Շենգավիթի հարկային տեսչության իրավաբանական և հարկադիր գանձումների բաժնում։ 2013-2014 թվականներին որպես հետաքննիչ աշխատել է ՀՀ կառավարությանն առընթեր պետական եկամուտների կոմիտեի հետաքննության վարչությունում։
2019 թվականի հունիսի 19-ին ՀՀ վարչապետ Նիկոլ Փաշինյանի առաջարկությամբ նախագահ Արմեն Սարգսյանը Ռուստամ Բադասյանին նշանակալ է արդարադատության նախարար։ Ամուսնացած է։

Ունեցվածքը

Բադասյանը ՀՀ կառավարությանն առընթեր պետական եկամուտների կոմիտեի նախագահի առաջին տեղակալ նշանակվելու օրվա դրությամբ Բարձրաստիճան պաշտոնատար անձանց էթիկայի հանձնաժողովում անշարժ գույք չի հայտարարագրել։

Նա ունի MERCEDES-BENZ E 320 մակնիշի ավտոմեքենա, ինչպես նաև բաժնետոմսեր։
Նրա դրամական միջոցները կազմել են 500 դոլար, 600 եվրո և 650հազար դրամ։
Նրա եկամուտները կազմել են 2,514,709.00 դրամ, որից 500 հազար դրամը բաժնեմասից է ստացել, իսկ մնացածն աշխատանքի դիմաց վարձատրությունն է։

Իսկ 2018 թվականի տարեկան հայտարարագրում, երբ արդեն նա նախարար էր, Բադասյանն ունի 1,220.00 եվրո և 6,755,000.00 դրամ դրամական միջոց։

Նրա եկամուտները եռապատկվել են՝ հասնելով 18,186,322.00 դրամի, որից 1,951,195.00 շահաբաժինն է, իսկ մնացածն աշխատանքի դիմաց ստացած վարձատրություն։