ՏԵՍԱՆՅՈՒԹ. Խարկովում հանրակացարանից ցած նետված հայ երիտասարդը մանրամասներ է պատմել դեպքից
Խարկովի ֆիզիկական կուլտուրայի պետական ակադեմիայի ուսանող Արթուր Մարտիրոսյանը մանրամասներ է ներկայացրել ուսանողական հանրակացարանի վեցերորդ հարկի պատուհանից ընկնելու դեպքից:
Objectiv.tv-ին տված հարցազրույցում Մարտիրոսյանն ասել է, որ իրեն դուրս գցողները վեցն են եղել, և ինքը նրանց ճանաչել է: Տղան պատմել է, որ իրեն սենյակի պատուհանից դուրս են գցել այն ժամանակ, երբ ինքը դուրս է շպրտել ծանոթների՝ իր սենյակում թողած իրերը` կասկածելով, որ դրանցում հնարավոր է թմրանյութ լինի: Մարտիրոսյանը ենթադրել է, որ ծանոթներն այդ իրերի միջոցով ցանկացել են իր դեմ թակարդ լարել:
«Երկու-երեք րոպե անց հանկարծ սենյակիս դուռը կոտրեցին, սկսվեց կռիվը: Նրանք սկսեցին կռվել, հանեցին էլեկտրաշոկեր, դանակ: Ես մեր միջև սեղան դրեցի, մոտեցա պատուհանին և սկսեցի օգնություն կանչել»,-ասել է նա:
Ցած ընկնելուց հետո Մարտիրոսյանը թաքնվել է ավտոկանգառում, որտեղ խնդրել է ոստիկանություն կանչել:
Հանրակացարանի հսկիչը պատմել է, որ հայազգի ուսանողը նախքան այս միջադեպը երբևէ ուշադրության կենտրոնում չի եղել ու աչքի չի ընկել անկարգապահությամբ: Այժմ դեպքի հետաքննությամբ զբաղվում են իրավապահները:
