Վերջին 25 տարում Ադրբեջանը ինտենսիվորեն պատրաստվում է պատերազմի. ՀՀ վարչապետ
«Ադրբեջանը վերջին 25 տարում ինտենսիվորեն պատրաստվում է պատերազմի»: Այս մասին այսօր լրագրողների հետ հանդիպմանն ասաց ՀՀ վարչապետ Նիկոլ Փաշինյանը՝ պատասխանելով հարցին, թե որքանո՞վ է իրատեսական համարում պատերազմի հնարավոր վերսկսումը՝ հաշվի առնելով այն հանգամանքը, որ վերջին շրջանում հայ-ադրբեջանական սահմանին հակառակորդը սկսել է ավելի ինտենսիվ կերպով կրակոցներ հնչեցնել:
«Եթե ամենօրյա ռեժիմով կրակոցներ ենք ունենում՝ էական չէ շատ, թե քիչ, նշանակում է, որ պետերազմական- կիսապատերազմական վիճակում ենք: Վերջին երկու ամսվա ընթացքում ընթացքում որոշ օրերի լարում է նկատվում, բայց ընդհանուր առմամբ առկա կայունությունը և հանդարտությունը պահպանվում է: Հիմա հետևյալ իրավիճակում ենք՝ գիտեք, որ իմ և Ադրբեջանի նախագահի միջև հաղորդակցության ուղիներ են հաստատված: Այս շրջանում փորձում եմ հասկանալ, թե ինչ է կատարվում: Մենք ինֆորմացիաներ, մտահոգություններ ենք փոխանակում, իհարկե, այդտեղ ինչպես միշտ կան փոխադարձ մեղադրանքներ, և ես հույս ունեմ, որ մեզ կհաջողվի հասկանալ, թե ինչ և ինչու է կատարվում: Մեր վիրավոր զինվորներին մաղթում եմ շուտափույթ ապաքինում»,- ասաց վարչապետը:
