Հայաստանում կա սեռը փոխած 18 անձ․ Փաշինյան
Իշխանափոխությունից հետո՞ են Հայաստանում սեռական ոչ ավանդական կողմնորոշում ունեցող մարդիկ հայտնվել: Այսպես արձագանքեց վարչապետը Նիկոլ Փաշինյանը այսօր հրավիրված ամփոփիչ մամուլի ասուլիսի ժամանակ՝ անդրադառնալով ոչ ավանդական սեռական կողմնորոշում ունեցող անձանց վերաբերյալ հարցին։
«Բա ավանդապաշտ ուժերը, որոնք նման մարդկանց տվել են ՀՀ քաղաքացիություն, ի՞նչ էին մտածում: Այդ մարդկանց օժտել են բոլոր իրավունքներով: Ասում են՝ խարույկի վրա պետք է վառել, բա վառե՞իք: Հիմա մեզ մեղադրում են նրա մեջ, որ ՀՀ քաղաքացուն, որի անձնագիրը իրենք են տվել, մենք չենք վառում: Մենք ոչ մեկին չենք պատրաստվում վառե։ Հայտնի իրադարձություններից հետո, երբ ասում էին, որ ԱԺ-ն պետք է խնկարկել, ես բարձրաստիճան հոգևորականների հետ ունեցա հետևյալ զրույցը: Ասացի՝ սեռական ոչ ավանդական կողմնորոշում ունեցող մարդը, սեռափոխված մարդը իրավունք ունի՞ եկեղեցի մտնել, ասացին՝ այո, ունի, ասացի՝ իրավունք ունի՞ մոմ վառել, ասացին՝ իրավունք ունի: Ասացի՝ փաստորեն ստացվում է, որ ԱԺ-ն ավելի սուրբ տեղ է, քան եկեղեցին, հա՞: Ասում են՝ կարող է այդ մարդը գնալ եկեղեցի, նստել, հաղորդակցվել Աստծո հետ, բայց որ ԱԺ-ից ելույթ է ունեցել պետք է խնկարկե՞լ, սատանայազերծե՞լ: Բա եկեղեցի ինչո՞ւ եք թողնում մտնի, ուրեմն եկեղեցին սկզբից պետք է խնկարկել, հետո մտածել դրա մասին։ ՀՀ-ում էսօր կա սեռը փոխած 18 անձ, որոնց բոլորին մինչև մեր իշխանության գալը տրվել է ՀՀ քաղաքացու անձնագիր ու էս իրավիճակը մենք ստացել ենք որպես ժառանգություն»,- ասաց Նիկոլ Փաշինյանը:
