Արսեն Ջուլֆալակյանն իր հոր հետ ներկայացել է ոստիկանություն․ Լիլիթ Մակունց
ԱԺ «Իմ քայլը» խմբակցության պատգամավոր Արսեն Ջուլֆալակյանն իր հոր՝ Լևոն Ջուլֆալակյանի հետ մամուլի հրապարակումներից հետո շտապ ներկայացել է ոստիկանություն՝ պարզաբանում ստանալու նպատակով: Այս մասին ԱԺ-ում լրագրողների հետ զրույցում ասաց «Իմ քայլը» խմբակցության ղեկավար Լիլիթ Մակունցը: «Արսեն Ջուլֆալակյանն ու հայրն ասել են, որ չի համապատասխանում իրականությանը, ներկայացել էին ոստիկանություն, որպեսզի հասկանային, թե ինչի մասին է խոսքը, պարզաբանել էին, թե Արսեն Ջուլֆալակյանի ընկերոջ հետ ինչ խոսակցություն չի եղել: Հաստատում եմ, որ նման խոսակցություն չի եղել: Որքանով հրապարակվել է մամուլում, որևէ վնասվածք քաղաքացին չի ստացել, հայտնվել է հիվանդանոցում բարձր ճնշման հետևանքով, մնացյալին վերաբերողը քաղաքական տիրույթում չէ»,- ասել է նա: Հարցին, թե ինչ պայմաններում է Արսեն Ջուլֆալակյանի բիզնես գործընկերը վնասվածքներով հայտնվել հիվանդանոցում, Լիլիթ Մակունցը պատասխանեց. «Որքան գիտեմ, որևէ վնասվածք քաղաքացին չի ստացել և հայտնվել է հիվանդանոցում բարձր ճնշման հետևանքով: Քանի որ սա քաղաքական տիրույթում գտնվող հարց չէ և վերաբերում է միջանձնային հարաբերություններին, խնդրեմ, որ լրացուցիչ պարզաբանումներ ստանաք հենց Արսեն Ջուլֆալակյանից»:

Քաղաքականություն

Պատահարներ