«Ես գնդապետ տղա, ըտենց նման ե՞մ փչողի». արտակարգ դեպք՝ ՊՆ զորամասերից մեկի հրամանատարի մասնակցությամբ
Արտակարգ դեպք է տեղի ունեցել Արմավիրի մարզում: ֆոտոլրագրող Գագիկ Շամշյանը տեղեկացնում է, որ Ճանապարհային ոստիկանության աշխատակիցները կանգնացրել են մեքենա, որի վարորդը կասկած է առաջացրել ոստիկանների մոտ, ու նրանք ենթարկել են վարորդին սթափության փորձաքննության ու պարզվել է, որ նա ավտոմեքենան վարել է ոչ սթափ վիճակում:
Ավտոմեքենան տեղափոխվել է հատուկ պահպանվող տարածք, որից հետո այդ մասին իմանալով, ուժային կառույցի մի ներկայացուցիչ ժամանել է ոստիկանության Վաղարշապատի բաժին ու ոչ միայն անարգալից վերաբերմունք ցուցաբերել հասարակության նկատմամբ, այլ նաև ոստիկանության ծառայողների հասցեին հնչեցրել է հայհոյանքներ ու բաժնի բակում հայտարարել, որ ՙում ավտոմեքենան որ տեղափոխվել է ՙպլաշչադկա՚, պետք է անհապաղ բաց թողնեն ու վարորդի վրա գրված խմածության ակտը չեղարկվի՚, քանի որ նա իր ընկերն է ու միասին են մի քանի բաժակ խմել:
Ֆոտոլրագրողը հայտնում է նաև, ոստիկանները նկատել են, որ նա նույնպես ավտոմեքենայով է, նրանից պահանջել են վարորդական իրավունքի վկայական ու խնդրել են, որպեսզի նա նույնպես ենթարկվի սթափության փորձաքննության: Այդ ամենը դուր չի եկել անկոչ հյուրին, որն ասել է. ՙԵս գնդապետ տղա, ըտենց նման ե՞մ փչողի՚ ու հրաժարվել կատարել ճանապարհային ոստիկանի օրինական պահանջը: Շամշյանի տեղեկություններով, այս ամենին ականատես են եղել Վաղարշապատի ԱԱԾ բաժնի ծառայողները: Գնդապետ ներկայացած անձը ծառայում է ՊՆ զորամասերից մեկում՝ որպես հրամանատար:
