Ռ. Մելիքյանը՝ սանավիացիայի ուղղաթիռով տեղափոխված ու մահացած 2 անձի մասին

Արցախի Հանրապետության Մարդու իրավունքների նախկին պաշտպան Ռուբեն Մելիքյանը մտահոգիչ է համարում տեղեկությունը, որ օրեր առաջ սանավիացիայի ուղղաթիռով Վանաձորի բժշկական կենտրոնից Երևան տեղափոխված մի անձ չի մահացել, այլ երկուսը: «Այս տեղեկությունը խիստ մտահոգիչ է՝ հիվանդներ տեղափոխելու համար ենթադրաբար հատուկ չհարմարեցված ուղղաթիռի շահագործման հետևանքների առումով։ Այստեղ առկա է կյանքի իրավունքի պաշտպանության հարց՝ պետության պոզիտիվ պարտականության առումով։ Այս հարցով «Իրավական ուղի» ՀԿ-ն պատրաստ է մահացածների հարազատներին տրամադրել անհրաժեշտ իրավական աջակցություն»,-ֆեյսբուքյան իր էջում գրել է Մելիքյանը։ Ավելի վաղ մամուլը գրել էր, որ 68-ամյա քաղաքացին իրականում մահացել է ոչ թե հիվանդանոցում, այլ ուղղաթիռի մեջ՝ ճանապարհին, և որ այդ ուղղաթիռներն իրականում հարմարեցված չեն բժշկական ծառայություններ մատուցելու համար, և այդ մասին բարձրաձայնել են տարբեր մասնագետներ։ Իսկ այսօր Armdaily. am-ը գրել է, որ ուղղաթիռով 2 հիվանդ են տեղափոխվել, և երկուսն էլ մահացել են: Ըստ լրատվամիջոցի՝ նշված ուղղաթիռով տեղափոխված հիվանդներից ոչ թե միայն մեկն է մահացել, այլև երկու մահ է գրանցվել, որոնցից մեկը գրանցվել է «Աստղիկ» բժշկական կենտրոնում, մյուսը ՝ «Էրեբունի» բժշկական կենտրոնում։