ՀՀ վարչապետ Նիկոլ Փաշինյանը «Независимая газета»-ին տված հարցազրույցում պատասխանել է հայ-ամերիկյան հարաբերությունների մասին հարցին՝ Սիրիա հայկական մարդասիրական առաքելություն ուղարկելուց հետո: «Հայաստանի ոչ մի կառավարություն Սիրիա մարդասիրական ռազմական առաքելություն ուղղարկելու հետ կապված Վաշինգտոնի կողմից չի քննադատվել այնքան կոշտ, համենայն դեպս հրապարակայնորեն՝ որքան ներկայիս կառավարությունը: Ինչպե՞ս եք Միացյալ Նահանգների հետ շտկելու հարաբերությունները», - հետաքրքրվել է «Независимая газета»-ի մեկնաբան Յուրի Սիմոնյանը: «Կա և հակառակը: Հայաստանի որևէ կառավարություն ԱՄՆ-ին չի քննադատել այնպես, ինչպես ես: Մեզ համար կարևորը մեր անկախությունն ու ինքնիշխանությունը պահպանելն է», - պատասխանել է Հայաստանի վարչապետը: Նրա խոսքով՝ Հայաստանը չի կարող գոյություն ունենալ տարածաշրջանային և միջազգային հարաբերություններից կտրված: «Մենք միշտ բաց ենք քննարկումների համար նաև Սիրիա ուղարկված առաքելության հարցով: Եվ պատրաստ ենք պատասխանել նրանց բոլոր հարցերին: Կարծում ենք, որ ճիշտ որոշում ենք կայացրել: Ապրիլի 24-ին լրացել է Հայոց ցեղասպանության զոհերի ոգեկոչման հերթական տարելիցը: Եթե հայ սակրավորներն ականազերծեն մի փոքր տարածք այն երեխաների խաղահրապարակի համար, որոնց նախնիները թեկուզ մեկ հայի կյանք են փրկել, իսկ Հալեպում նման մարդիկ հաստատ կան, ապա մեր առաքելությունն արդարացված է: Եթե հայ բժիշկները փրկեն գեթ մեկ սիրիացու, որի նախնիները փրկել են մեկ հայի Ցեղասպանության ժամանակ, ապա մեր առաքելությունն արդարացրել է իրեն: Իսկ դա իրականացվել է. մեր բժիշկները Սիրիայում ավելի քան 100 վիրահատություն են անցկացրել», - նշել է Փաշինյանը: Խոսելով Ռուսաստանի Դաշնության հետ ռազմավարական հարաբերություններին առնչվող հարցերի շուրջ, Փաշինյանն ասել է․ «Ռուսաստանի հետ մեր հարաբերություններում ոչինչ չի փոխվել: Եթե ինչ-որ բան փոխվել է, ապա միայն դրական ուղղությամբ: Ինչպես և խոստացել էի, մեր հարաբերություններում մութ անկյուններ չկան, մեր դիրքորոշումն աշխատանքային զրույցներում և հաղորդակցության մեջ չի տարբերվում հանրային ելույթներից, և դա լավ հնարավորություն է նոր մակարդակի հասցնելու մեր հարաբերությունները: Իհարկե, Ռուսաստանը մեր ռազմավարական գործընկերն ու դաշնակիցն է: Սակայն պետք է հաշվի առնել, որ մենք ունենք մեր ներքին քաղաքական օրակարգը, որը չի համընկնում ո՛չ Ռուսաստանի, ո՛չ Բելառուսի, ո՛չ Ղազախստանի, ո՛չ Ֆրանսիայի, ո՛չ ԱՄՆ-ի ներքին քաղաքական օրակարգի հետ», - ասել է Փաշինյանը: