Եթե բռնենք, բոլորին դատենք, վաղը այդ գործերը գնալու են ՄԻԵԴ. Փաշինյան
«Ի՞նչ քայլեր են արվում անցումային արդարադատություն իրականացնելու հարցում»,- ֆեյսբուքյան ուղիղ եթերում այս հարցին անդրադարձավ ՀՀ վարչապետ Նիկոլ Փաշինյանը: Նա նշեց, որ քննարկումներ պետք է լինեն այս հարցով, ուսումնասիրություններ, որպեսզի սխալ քայլեր չարվեն:
«Ունքը սարքելու տեղը կարող ենք աչքն էլ հանել», – ասաց նա՝ նշելով, որ այդ փոփոխությունները մեկ-երկու ամսում չեն կարող լինել, պիտի երկար ճանապարհ անցնեն:
Նա հիշեցրեց՝ սխալվելու դեպքում կարող են ՄԻԵԴ-ում բողոքներ հայտնվել:
«Ի վերջո, կա ՄԻԵԴ: Եթե գնանք, բռնենք, բոլորին դատենք, անցումային արդարադատության ենթարկենք, վաղը այդ գործերը գնալու են ՄԻԵԴ, և եթե այնտեղ պարտվենք, այն պրոցեսները, որ գնացել են, պիտի նորից հետ պտտվեն: Արդյունքում կստացվի, որ ոչ մի բան չարեցինք, քանի որ պետք է արագ ինչ-որ բան անել»,- ասաց նա:
