Աղբահանության երկրորդ օպերատոր ունենալը միֆ է. Մհեր Գրիգորյան
Կառավարության այսօրվա նիստում քննարկվեց Երեւան համայնքի համար աղբատար ավտոմեքենաների ուղիղ գնման միջոցով ձեռք բերելու հարցը:
Այն ներկայացրեց տարածքային կառավարման եւ զարգացման նախարար Սուերն Պապիկյանը:
«Հաշվի առնելով, որ Երեւան համայնքում էապես վատթարացել է սանիտարական վիճակը` աղբահանությունը ոչ պատշաճ իրականացնելու հետեւանքով, եւ դրանով պայմանավորված՝ առաջացել է Երեւանի քաղաքապետարանի ուղիղ միջամտության կարիքը, ուստի աղբատար ավտոմեքենաների ձեռքբերումը գնման մրցակցային ընթացակարգով ժամկետների առումով կառաջացնի համայնքի սանիտարական կոլապս: Դրա համար անհրաժեշտություն է առաջացել այդ մեքենաները ձեռք բերել ուղիղ գնման եղանակով.,-ասաց Պապիկյանը՝ հավելելով, որ մրցույթով ձեռք բերելու դեպքում՝ խոսքը 24 աղբատար մեքենաների մասին էր, իսկ այս որոշման մեջ խոսքը 15 մեքենայի մասին է:
Նիկոլ Փաշինյանը նկատեց, որ աղբատար մեքենաների ձեռք բերումը խիստ անհրաժեշտություն է, որովհետեւ եթե հիմա «Սանիթեք»-ի հետ պայմանագիրը չեղարկվի, ապա աղբը որեւէ ձեւով չի հավաքվելու:
Պապիկյանը հավելեց, որ այժմ քաղաքապետարանը փորձում է ձեւավորել երկրորդ օպերատոր. «Այսինքն Երեւանի քաղաքապետարանի իրավասության ներքով ձեւավորվելու է ընկերություն, որն էլ իրականացնելու է իր մասով աղբահանությունը»:
Փոխվարչապետ Մհեր Գրիգորյանը նկատեց, որ երկրորդ օպերատոր ունենալը միֆ է, որովհետեւ մեր աղքը քիչ է, իսկ միայն աղբատար մեքենա գնելով հարցը չի լուծվում:
Փաշինյանի խոսքով, փաստն այն է, որ այսօր կա մեկ օպերատոր՝ «Սանիթեքը», որն իր աշխատանքը նորմալ չի կատարում: «Միայն տուգանելով հարցը չի լուծվում, մեկ տուգանեց, երկու տուգանեց: Ինչ պետք է անի քաղաքապետարանը, պետք է խզի պայմանագիրը ու նոր մրցույթ հայտարարի: Եթե անգամ նախքան խզելը մրցույթ հայտարարի, գործող օպերատորը արդեն ճամպրուկային տրամադրություն է ունենալու, իրեն չի էլ հետաքրքրելու աղբահանության հարցը: Այսինքն մինչեւ նոր օպերատորի ներգրավումը մենք ունենք մի դատարկ շրջան, որը պետք է լցնենք, բայց մենք չունենք աղբահավաքությամբ զբաղվող կառույց: Իսկ գլոբալ առումով միտքը հետեւյալն է, որ չի կարելի ունենալ միայն մեկ օպերատոր, ռիսկեր են առաջանում: Հետեւաբար, պետք է լինի մեկ օպերատոր, եւ Երեւանի քաղաքապետարանը պետք է ունենա ռեսուրսներ կառավարելու այն ռիսկերը, որ կարող են առաջանալ օպերատորի անգործության պարագայում»,-ասաց Փաշինյանը:
