Ինչպես արդեն տեղեկացրել էինք, ապրիլի 1-ին վարչապետի որոշմամբ աշխատանքից ազատվել էր տեսչական մարմինների աշխատանքների համակարգման գրասենյակի ղեկավար Հայկ Այվազյանը: Արդեն մի քանի օր է անցել ազատումից, սակայն Այվազյանը տեղյակ չէ իրեն աշխատանքից ազատելու պատճառների մասին: «Հայկական ժամանակ»-ի հետ զրույցում Հայկ Այվազյանը հայտնել է, որ իր ազատման հետ կապված միայն կարող է ենթադրություններ անել, քանի որ իրեն որևէ պատճառ չեն ներկայացրել: Մինչ այդ Այվազյանի ազատվելու մասին ոչ մի խոսակցություն կամ ակնարկ չի եղել: «Պաշտոնապես ոչ ոք իմ ղեկավարությունից կամ գոնե ղեկավարության անունից չեն հայտնել, թե ինչի հիման վրա են ինձ ազատել աշխատանքից»- լրատվականին ասել է Այվազյանը: Շրջանառվող տեղեկությունների համաձայն` Այվազյանի ազատման պատճառը վարչապետի աշխատակազմի ղեկավար Էդուարդ Աղաջանյանի հետ ունեցած տարաձայնություններն են: Լրատվամիջոցը Այվազյանից փորձել է ճշտել, թե արդյո՞ք իրականությանը համապատասխանում են այն լուրերը, որ ինքը կոնֆլիկտ է ունեցել կառավարության աշխատակազմի ղեկավար Էդուարդ Աղաջանյանի հետ. «Եթե կոնֆլիկտ եղել է, ապա այն գործնականի հետ կապ չի ունեցել: Ցավոք, կառավարության համար շատ լուրջ խնդիր է, որ մարդիկ գործնականը իրենց անձնականի հետ են կապում»: Այվազյանը չի բացառել, որ իր ազատումը հնարավոր է նախապես պլանավորված է եղել, քանի որ վերջինիս ազատման հենց նույն օրը նոր ղեկավար է նշանակվել: «Հույս ունեմ, որ իմ ազատումը նախապես պլանավորած է եղել, այլապես ինձ թույլ կտամ ասել, որ մեր երկրում անկառավարելի բաներ են տեղի ունենում: Պայքարելու եմ ճշմարտությունը հասցնել տեղ, որ վարչապետը իմանա, թե ինչ է կատարվում ներսում, և վերջիվերջո հասկանամ իմ ազատման պատճառները»,- վրդովված ասել է Տեսչական մարմնի գրասենյակի նախկին ղեկավարը: