Ավշարի ալյուրի գործարանի աշխատակիցներին չեն ծեծել. Ոստիկանություն
Ոստիկանությունից հերքում են «Մոդուս Գրանում» հոլդինգի սեփականատեր Գուրգեն Նիկողոսյանի այն հայտարարությունը, թե ոստիկանության 6-րդ վարչության աշխատակիցներն ահաբեկել են իր աշխատակիցներին, անգամ` մարդ են ծեծել քննելուց:
«Նման բան չի եղել, բայց եթե քաղաքացին պնդում է, որ իրեն ծեծել են, կարող է հաղորդում ներկայացնել և համապատասխան միջոցառումներ կձեռնարկվեն»,- Tert. am-ի հետ զրույցում ասացին ոստիկանության լրատվական բաժնից:
Հիշեցնենք, որ երեկ Tert.am-ի հետ զրույցում «Մոդուս Գրանում» հոլդինգի սեփականատեր Գուրգեն Նիկողոսյանն ասել էր, որ Ոստիկանության 6-րդ վարչության 12 աշխատակից ուսումնասիրություններ է կատարել Արմաշի ալյուրի գործարանում:
««Միլիցիայի» Վեդիի բաժանմունքից թաղայինների, գյուղապետերի միջոցով, բոլոր լծակներով իմ աշխատակիցներին աշխատանքից հետո տարել են, քննել են մինչև 22:30: Ու աշխատակիցներն առանց պաշտպանության են եղել, ահաբեկել են նրանց, անգամ` մարդ են ծեծել քննելուց: Ասել են՝ մենք ունենք ճիշտ տեղեկություն, եթե դու հիմա ճիշտ չգրես, 2.5 մլն քեզանից գումար ենք բռնագանձելու, արդեն քո ընկերոջը տարել են 6-րդ վարչություն և այլն: Իսկ այդ սենյակում, ինչ ասես, կարող են գրել, գործ են «կարում»»,- ասել էր Գուրգեն Նիկողոսյանը:
Ավելի ուշ, Ոստիկանությունը պարզաբանում էր տարածել «Արմաշի ալյուրի գործարանում» 6-րդ վարչության աշխատակիցների իրականացրած գործողությունների վերաբերյալ, սակայն չէր անդրադարձել սեփականատիրոջ այն հայտարարությանը, թե իր աշխատակիցներն ահաբեկվել և ծեծի են ենթարկվել:
