Քրեական հեղինակություն Նորագյուղցի Բոգոյի (Ռուբեն Կոստանյան) մտերիմները նրա իրերը Կենտրոնական ավտոկայանից հանելուց հետո սենյակները պարզապես ավերակի են վերածել: «Հայավտոկայարան» ՓԲԸ ներքին վերահսկողության եւ ուղեւորափոխադրումների վարչության պետ Արտաշես Ջիլավյանը Հայկական ժամանակի հետ զրույցում ասել է, որ ՓԲԸ-ի եւ Կոստանյանի իրավաբանները պայմանավորվել են, որ միայն Կոստանյանի գույքը հանեն տարածքից։ «Գույքը, որ տարել են, հետո միտումնավոր սկսել են փչացնել, ձեր ասած՝ վանդալիզմն է: Դա իրենց ռեմոնտ արածն է, ինչ որ իրենք արել են, ուզել են քանդեն, պոկեն, որ ոչինչ չմնա։ Այն, ինչը, որ կա, այլեւս ոստիկանության վերահսկողության տակ է, ոչ մի բան այլեւս իրենք չեն կարող անել։ Դռներն էին հանել, բայց տեղն են դրել»,- ասել է Ջիլավյանը՝ հավելելով, որ այժմ նրանց զգուշացվել է, որ պետք է սենյակները հին տեսքին բերվեն, այսինքն, այն տեսքին, որը եղել է մինչեւ Կոստանյանի իրականացրած վերանորոգումը։