Ոստիկանների միջնորդությամբ դպրոց եկող տնօրենը ազատվեց աշխատանքից
ՀՀ քննչական կոմիտեի Արմավիրի մարզային քննչական վարչության կողմից ՀՀ Արմավիրի մարզպետ Համբարձում Մաթևոսյանին ուղղված «Այգեվանի Մ. Խորենացու անվան միջնակարգ դպրոց» և «Լենուղու Ջիվանու անվան միջնակարգ դպրոց» պետական ոչ առևտրային կազմակերպությունների տնօրենների վերաբերյալ «Հանցանքի կատարմանը նպաստող հանգամանքները վերացնելու ուղղությամբ միջոցներ ձեռնարկելու մասին» միջնորդագրերը քննարկվել են մարզպետի մոտ հրավիրված խորհրդակցությունների ընթացքում:
Արմավիրի մարզպետարանից տեղեկացնում են, որ տեղի ունեցած քննարկումների արդյունքում վերը նշված դպրոցների տնօրենները զբաղեցված պաշտոնից ազատվելու վերաբերյալ դիմում են ներկայացրել մարզպետ Համբարձում Մաթևոսյանին և վերջինիս համապատասխան որոշումներով ազատվել զբաղեցրած պաշտոններից:
Հիշեցնենք, որ Արարատի մարզի Ավշար գյուղի միջնակարգ դպրոցում արդեն 6-րդ օրն էր, ինչ չէին դադարում դասադուլն ու գործադուլը: Երևանի ավագանու նախկին անդամ Սոնա Աղեկյանն էլ հայտնում էր, որ Ավշարի դպրոցի տնօրենը ոստիկանների միջնորդությամբ է դպրոց գալիս:
