Այսօր՝ մարտի 14-ին, վրաերթ է տեղի ունեցել Երևանում։ Ժամը 14։45-ի սահմաններում Երևանի բնակիչ՝ 21-ամյա Ռոման Օհանյանը Նանսենի փողոցում իր վարած ВАЗ 2121 մակնիշի 98 FO 008 համարանիշի ավտոմեքենայով վրաերթի է ենթարկել փողոցը չթույլատրելի հատվածով անցնող հետիոտնին։ Այս մասին տեղեկանում ենք Shamshyan com-ից։ Ինչպես դեպքի վայրից հայտնում է ֆոտոլրագրող Գագիկ Շամշյանը, վարորդը փախուստի չի դիմել, օգնել է վրաերթի ենթարկվածին, ով 9 տարեկան աղջնակ է, տեղափոխել «Սուրբ Գրիգոր Լուսավորիչ» բժշկական կենտրոն։ Օպերատիվորեն ժամանել են ոստիկանության Երևան քաղաքի վարչության ՊՊԾ գնդի 2-րդ վաշտի ոստիկաններ Տիգրան Պետրոսյանն ու Հարություն Թագվորյանը, ովքեր դեպքի վայրը պահել են, մինչև ժամանել են ճանապարհային ոստիկանության 1-ին սպայական գումարտակի 8-րդ դասակի տեսուչներ Կարեն Խուդանյանն ու Վարդան Միրզոյանը։ Ոստիկանությունը պարզում է վիրավորի ինքնությունը։ Վարորդը տեղում ենթարկվեց սթափության փորձաքննության. պարզվեց, որ նա եղել է սթափ։