ՏԵՍԱՆՅՈՒԹ. 36-ամյա տղան ցույց է տվել, թե ինչպես է սպանել հորը

Մարտի 11-ին Հայաստանի քննչական կոմիտեի Կոտայքի մարզային քննչական վարչության պետ, արդարադատության գնդապետ Մհեր Վարդանյանի որոշմամբ ստեղծված քննչական խմբի ղեկավար, Կոտայքի քննչական բաժնի հատկապես կարևոր գործերով ավագ քննիչ Սոս Սեդրակյանի գլխավորությամբ քննչական փորձարարություն տեղի ունեցավ Ջրվեժ գյուղի 8-րդ փողոցի 14 տանը: Ինչպես հայտնում է ֆոտոլրագրող Գագիկ Շամշյանը, քննչական փորձարարության ժամանակ նշված տան բնակիչ, 64-ամյա Մելքոն Չոլախյանի սպանության մեջ կասկածվող, նրա տղա, 36-ամյա Գևորգ Չոլախյանը մանեկենի վրա ցույց տվեց, թե ինչպես և ինչ պայմաններում է դանակի հարվածներ հասցրել հորը, ով տեղում մահացել էր: Ինչպես ավելի վաղ դեպքի վայրից հայտնել էր ֆոտոլրագրողը, մարտի 10-ին առանձնակի դաժանությամբ սպանություն էր տեղի ունեցել Կոտայքի մարզում: Ժամը 13:50-ի սահմաններում ոստիկանության Աբովյանի բաժին ահազանգ էր ստացել, որ Ջրվեժ գյուղի 8-րդ փողոցի 14 տանը տղամադու դի կա: Ոստիկաններն ու քննիչները նշված տան ննջասենյակում հայտնաբերել էին տանտիրոջ՝ 64-ամյա Մելքոն Չոլախյանի դին: Դատաբժշկի նախնական եզրակացության համաձայն, մարմնի վրա կային սուր կտրող-ծակող առարկայի բազմաթիվ հեռքեր: Կոտայքի բաժնի և ոստիկանության Գառնիի բաժանմունքի ծառայողները տաք հետքերով սպանություն կատարելու կասկածանքով հենց դեպքի վայրում՝ տանից դուրս գալիս, ոստիկանության Աբովյանի բաժին էին բերման ենթարկել սպանվածի տղային՝ նույն հասցեի բնակիչ, 36-ամյա Գևորգ Չոլախյանին: Փաստի առթիվ հարուցվել էր քրեական գործ: Դիակի կողքին՝ վառարանում, ոստիկանները հայտնաբերել էին 2 դանակ, որոնցից մեկը բռնակից կոտրված էր և այդ ամենի վրա կային արնանման հետքեր: Քննիչը դանակները առգրավել էր: