Երևանի քաղաքապետարանը հայտարարել է շուրջ 900 մլն դրամ արժողությամբ 24 աղբատար մեքենաների մրցույթ, որին չէր կարող հաղթել այլ կազմակերպություն, քան Կամազ ներկրող կազմակերպությունը։ Այս մասին Facebook-ի իր էջում գրել է Երևանի ավագանու «Լույս» խմբակցության ղեկավար Դավիթ Խաժակյանը: Նա, մասնավորապես, գրել է. «Բանն այն է, որ տեխնիկական բնութագրերը կարծես գրված լինեն հենց Կամազի տվյալ մակնիշի համար եւ խոչընդոտում են այլ կազմակերպությունների մասնակցությունը այդ մրցույթին։ Ուշագրավ է այն հանգամանքը, որ քաղաքապետարանը որպես տեխնիկական բնութագիր 24 աղբատար մեքենաների համար նշել է Euro 3 բնապահպանական ստանդարտը!!! Բանն այն է, որ 2018թ․ հունվարի 1-ից արգելված է ԵՏՄ տարածքում արտադրել Euro 5 ստանդարտից ցածր ստանդարտի շարժիչներ։ Որեւէ այլ կազմակերպություն չէր կարող հաղթել այս մրցույթում անկախ ներկայացրած գնից, քանի որ արգելված է Euro 3-ի արտադրությունը եւ ներկրումը ԵՏՄ տարածքում։ Եթե պարզվի, որ ներկրված մեքենաները իսկապես Euro 3 են, ապա լուրջ հարց է առաջանալու, թե ինչպե՞ս են դրանք արտադրվել Ռուսաստանում եւ ինչո՞ւ են մեր պետական մարմինները թույլ տվել դրանք ներկրել Հայաստան։ Իսկ եթե պարզվի, որ ներկրված մեքենաները իրականում Euro 5 են, կնշանակի, որ մրցույթի տեխնիկական պայմաններով արհեստական արգելք է ստեղծվել 900 մլն դրամ արժողությամբ մրցույթին այլ կազմակերպությունների մասնակցության համար։ Հ․Գ․ Եվրոպական երկրներում Euro 3-ի արտադրությունը վաղուց արգելված է վերջինիս արտանետումների մեծ ծավալի պատճառով, իսկ այն որ ԵՏՄ-ում այն եւս արգելված է, գրեթե համոզված եմ, որ տեղյակ էին նաեւ այս գնումն իրականացնող պաշտոնյաները»: