Ցանկացած փորձ կկասեցվի ասֆալտին փռելով, պատերին տալով կամ այլ օրինական միջոցներով. Նիկոլ Փաշինյան

«Մեր դատական համակարգում կան խնդիրներ ու գիտենք կառավարության վերաբերմունքը այդ համակարգի անկախության նկատմամբ: Համոզված ենք, որ դատական համակարգի 100 տոկոսով անկախությունը կարևոր է»,-այս մասին այսօր կառավարության նիստում հայտարարեց ՀՀ վարչապետը՝ ընդգծելով, որ մի կողմից պետք է խստորեն պայքարել կոռուպցիայի, կամայական որոշումների դեմ, մյուս կողմից՝ քայլեր ձեռնարկել, որ ապօրինի որոշումների ծագման սոցիալական բաղադրիչը հնարավորինս նվազեցվի: Հիշեցնենք՝ քննարկվում է դատական համակարգի սոցիալական երաշխքների մասին նախագիծը: «Մեր հեղափոխությունը հոկտեմբերյան հեղափոխությունը չէ, որ պատերի տակ գնդակահարում էին հակառակողներին, բաժանում էին կարմիրների ու սպիտակների, մեր դեպքում` սևերի ու սպիտակների։ Սա սիրո և համերաշխության հեղափոխություն է, և յուրաքանչյուրը պետք է փոխվելու, նոր արժեքային համակարգը որդեգրելու շանս ունենա։ Բայց հակառակի շանսը` նախահեղափոխական արժեքներին, հարաբերություններին վերադառնալու շանս չպիտի լինի»,– ասաց Փաշինյանը։ Նա նաև, որպես ՀՀ վարչապետ, խոստացավ որ ցանկացած նման փորձ կկասեցվի։ «Կկասեցվի ամենախիստ ձևով` լինի դա ասֆալտին փռելու, պատերին տալով, թե որևէ այլ օրինական միջոցներով»,– ասաց նա։