Հայաստանը բիզնես վարելու համար լավագույն երկրների ցանկում է. Forbes
Բիզնես վարելու համար երկրորդ տարին անընդմեջ լավագույն երկիր է ճանաչվում Մեծ Բրիտանիան, որի առաջատարի դիրքը չի խախտվել նույնիսկ Brexit-ի շուրջ տիրող մտահոգության պատճառով:
Forbes-ի փորձագետները ներկայացրել են The Best Countries For Business ամենամյա վարկանշային աղյուսակը, որը Մեծ Բրիտանիան առաջին անգամ գլխավորել էր անցյալ տարի և կարողացել է պահպանել առաջատարի դիրքը:
Forbes-ի զեկույցում նշվում է, որ Մեծ Բրիտանիան միակ երկիրն է, որը 30-րդ հորիզոնականից ներքև չի իջել վարկանշային աղյուսակը կազմելիս հաշվի առնվող 15 ցուցանիշից որևիցե մեկն ուսումնասիրելիս: Ցանկում տեղ է գտել 161 երկիր:
Մեծ Բրիտանիային հաջորդել են Շվեդիան, Հոնկոնգը, Նիդեռլանդները, Նոր Զելանդիան, Կանադան, Դանիան, Սինգապուրը, Ավստրալիան, Շվեյցարիան:
Հայաստանն աղյուսակում զբաղեցրել է 81-րդ տեղը ՀՆԱ-ի ցուցանիշի 7,5 տոկոս աճով: Մեկ շնչին բաժին ընկնող ՀՆԱ-ն մեր երկրում կազմում է 3900 դոլար:
Հարևան երկրներից Թուրքիան հայտնվել է 57-րդ հորիզոնականում, Վրաստանը՝ 44 -րդ, Ադրբեջանը՝ 70-րդ: Ռուսաստանը զբաղեցրել է 55-րդ տեղը:
