Ուկրաինայում լարվածությունը չի մարում․ Զելենսկին քննարկում է բանակի հրամանատարի փոփոխությունը

Ուկրաինայի նախագահի աշխատակազմի ղեկավար Կիրիլ Բուդանովը հայտարարել է, որ իշխանությունները լսել են հասարակության պահանջները և խոստացել են, որ առաջիկայում կլինեն «արդյունքներ»։ Նա քաղաքացիներին կոչ է արել պահպանել հանգստություն՝ ընդգծելով, որ իշխանության և հասարակության միջև բաց քննարկումները բնական երևույթ են ազատ երկրում։

«Հասարակությունը լսել է։ Աշխատանքն ընթանում է։ Արդյունքներ կլինեն», - գրել է Բուդանովը՝ հավելելով, որ ներքին տարաձայնությունները չպետք է վերածվեն պառակտման, քանի որ «թշնամին ուշադիր հետևում է դրանց»։

Ավելի վաղ Ուկրաինայում պաշտպանության նախարար Միխայիլ Ֆեոդորովը պաշտոնանկ էր արվել։ «Ուկրաինսկայա պրավդա»-ի տեղեկություններով՝ դրա պատճառներից մեկը գլխավոր հրամանատար Ալեքսանդր Սիրսկու հետ ունեցած տարաձայնություններն էին։

Ֆեոդորովի պաշտոնանկությունից հետո Կիևում և Ուկրաինայի մի շարք այլ քաղաքներում սկսվել են բողոքի ակցիաներ։ Ցուցարարները պահանջում են վերականգնել Ֆեոդորովին պաշտպանության նախարարի պաշտոնում, ինչպես նաև պաշտոնանկ անել ԶՈւ գլխավոր հրամանատար Ալեքսանդր Սիրսկուն։

Միաժամանակ «Ուկրաինսկայա պրավդա»-ի աղբյուրները հայտնում են, որ նախագահ Վոլոդիմիր Զելենսկին արդեն քննարկում է Սիրսկուն փոխարինելու հնարավորությունը։ Հնարավոր թեկնածուների թվում նշվում են օդադեսանտային զորքերի հրամանատար Օլեհ Ապոստոլը, Գլխավոր շտաբի պետի տեղակալ Վլադիմիր Գորբատյուկը և Միացյալ ուժերի հրամանատար Միխայիլ Դրապատին։ Սակայն վերջնական որոշում դեռ չի կայացվել։

Վերջին օրերին Զելենսկին մի շարք հանդիպումներ է անցկացրել բարձրաստիճան զինվորականների հետ՝ քննարկելով բանակի հետագա կառավարման հարցերը։