Պենտագոնը թաքցրել է Իրանի հարվածների հետևանքով տասնյակ վիրավորված ամերիկացի զինծառայողների մասին տեղեկությունը. NYT

ԱՄՆ պաշտպանության նախարարությունը (Պենտագոնը) չի հրապարակել տեղեկություններ այն մասին, որ անցյալ շաբաթ Իրանի հարվածների հետևանքով Հորդանիայում տասնյակ ամերիկացի զինծառայողներ վիրավորվել են։ Այս մասին, հղում անելով իր աղբյուրներին, գրում է The New York Times-ը։

Պարբերականի տվյալներով՝ անցյալ շաբաթ Իրանի զինված ուժերը չորս անգամ հարվածներ են հասցրել Հորդանիայում տեղակայված ամերիկյան ռազմական օբյեկտներին։

ԱՄՆ զինված ուժերի Կենտրոնական հրամանատարությունը (CENTCOM) պաշտոնապես հայտնել էր միայն հուլիսի 17-ին տեղի ունեցած՝ հարվածների չորրորդ ալիքի հետևանքների մասին։ Ըստ պաշտոնական տվյալների՝ զոհվել է երկու ամերիկացի զինծառայող, մեկը համարվում է անհետ կորած, չորսը հոսպիտալացվել են, ևս մի քանիսը ստացել են թեթև վնասվածքներ։

Սակայն, ըստ The New York Times-ի, նախորդ երեք հարվածների ընթացքում ևս տասնյակ ամերիկացի զինծառայողներ վիրավորվել են, սակայն Պենտագոնը դրա մասին չի հայտնել։ Բացի այդ, վնասվել են նաև մի քանի ամերիկյան ռազմական ուղղաթիռներ։

Պենտագոնի ներկայացուցիչը NYT-ին հայտնել է, որ գերատեսչությունը պարտավոր չէ հրապարակել այն վիրավորների մասին տեղեկությունը, որոնց վնասվածքները թեթև են եղել և թույլ են տվել արագ վերադառնալ ծառայության։ Նրա խոսքով՝ նման տեղեկությունների հրապարակումը կարող էր օգնել Իրանի զինված ուժերին գնահատել իրենց հարվածների արդյունավետությունն ու ճշգրտել հետագա գործողությունները։