Հորմուզի նեղուցում հարձակման են ենթարկվել հունական երկու նավթատար․ մեկում հրդեհ է բռնկվել

Օմանի ափերի մոտ՝ Հորմուզի նեղուցի շրջանում, հարձակման են ենթարկվել հունական Dynacom Tankers ընկերության կառավարման տակ գտնվող երկու նավթատարներ։ Այս մասին հայտնում է Reuters-ը։

Ընկերության տեղեկություններով՝ երկու նավերն էլ խոցվել են անհայտ ծագման արկերով, երբ անցնում էին Հորմուզի նեղուցով։ Ավելի ծանր վնասներ է ստացել Kavomaleas նավթատարը, որը երկու հարվածի հետևանքով բռնկվել է․ հրդեհը սկսվել է շարժիչային բաժանմունքում, ինչից հետո անձնակազմը տարհանվել է։

Երկրորդ նավթատարը նույնպես վնասվել է, սակայն ավելի թեթև աստիճանով։

Dynacom Tankers-ը հայտնել է, որ Օմանի իշխանությունները հայտնաբերել և անվտանգ ափ են տեղափոխել երկու նավերի անձնակազմերին։ Ընկերությունը նշել է, որ մշտական կապի մեջ է տարածաշրջանի համապատասխան կառույցների հետ։

Միջադեպը տեղի է ունեցել ԱՄՆ-ի և Իրանի միջև լարվածության հերթական սրման ֆոնին, ինչը կրկին վտանգի տակ է դրել Հորմուզի նեղուցով իրականացվող միջազգային առևտրային նավագնացությունը։ Reuters-ի փոխանցմամբ՝ տարածաշրջանում շարունակվում է իրավիճակի զարգացումների մշտադիտարկումը։