Բեռլինը հարաբերությունների կարգավորման ուղղությամբ գործնական քայլեր չի արել. Պեսկով

Կրեմլը հայտարարել է, որ Գերմանիան մինչ այժմ որևէ գործնական քայլ չի ձեռնարկել Ռուսաստանի հետ հարաբերությունները կարգավորելու ուղղությամբ, սակայն Մոսկվան շարունակում է բաց լինել երկխոսության համար։

ՌԴ նախագահի մամուլի քարտուղար Դմիտրի Պեսկովը ճեպազրույցում նշել է, որ թեև եվրոպացի, այդ թվում՝ գերմանացի քաղաքական գործիչների կողմից այս թեմայով բազմաթիվ հայտարարություններ են հնչում, դրանք չեն արտացոլվում երկրների իրական քաղաքականության մեջ։

«Ոչ, նման քայլեր չեն եղել։ Մենք լսում ենք բազմաթիվ հայտարարություններ և քննարկումներ եվրոպացի քաղաքական գործիչների, այդ թվում՝ Գերմանիայում, սակայն գործնականում դրանք որևէ կերպ չեն արտացոլվում այդ երկրների իրական քաղաքականության մեջ»,- ասել է Պեսկովը։

Նրա խոսքով՝ Ռուսաստանը շարունակում է բաց մնալ երկխոսության համար և երբեք չի եղել հարաբերությունների խզման նախաձեռնողը։

«Ռուսաստանը շարունակում է բաց լինել երկխոսության համար։ Մենք երբեք չենք եղել հարաբերությունների կասեցման նախաձեռնողը։ Սակայն, իհարկե, այն փորձը, որը ձեռք ենք բերել, հետագայում հաշվի կառնենք երկխոսության վերականգնման ժամանակ»,- ընդգծել է նա։