Թրամփը քննադատել է Բայդենին, Օբամային ու Բուշին, ապա գովել Ռյուտեին

ԱՄՆ նախագահ Դոնալդ Թրամփը ՆԱՏՕ-ի գագաթնաժողովի շրջանակում Անկարայում կայացած հանդիպման ընթացքում խիստ քննադատել է ԱՄՆ նախկին նախագահներ Ջո Բայդենին, Բարաք Օբամային և Ջորջ Բուշին՝ հայտարարելով, որ նրանք տարիներ շարունակ չեն կարողացել հասնել նրան, որպեսզի ՆԱՏՕ-ի անդամ երկրներն ավելացնեն իրենց ռազմական ծախսերը։ Այս մասին հայտնում է ՏԱՍՍ-ը:

Թրամփի խոսքով՝ երկար տարիներ եվրոպական երկրները պաշտպանական ոլորտում մեծապես հենվել են Միացյալ Նահանգների վրա, մինչդեռ նախկին նախագահները չեն կարողացել փոխել այդ իրավիճակը։

«ՆԱՏՕ-ի երկրները տարիներ շարունակ օգտվում էին ԱՄՆ-ից։ Եթե Բայդենն ավելի խելացի լիներ, նա կստիպեր նրանց ավելի շատ վճարել։ Բայց նա դա չարեց։ Նույնը՝ Օբաման, դա պետք է տեղի ունենար շատ տարիներ առաջ, սակայն Օբաման էլ չարեց, Բայդենն էլ չարեց, և, անկեղծ ասած, Բուշն էլ չարեց»,- հայտարարել է Թրամփը։

Նրա խոսքը ընդհատել է ՆԱՏՕ-ի գլխավոր քարտուղար Մարկ Ռյուտեն՝ ընդգծելով, որ իրավիճակը փոխվել է հենց Թրամփի նախագահության շնորհիվ։

«Բայց հիմա դա տեղի ունեցավ հենց ձեր շնորհիվ։ Դուք արեցիք այն, ինչ դեռ նախագահ Դուայթ Էյզենհաուերն էր փորձում անել՝ հավասարեցնել Եվրոպայի և Միացյալ Նահանգների ռազմական ծախսերը։ ԱՄՆ ոչ մի նախագահ չէր կարողացել հասնել այդ արդյունքին, իսկ դուք դարձաք առաջինը»,- ասել է Ռյուտեն։

Ռյուտեի խոսքերից հետո Թրամփը ժպտալով արձագանքել է.

«Դրա համար էլ սիրում եմ նրան»։

Հանդիպման այս հատվածը լայն արձագանք է ստացել միջազգային մամուլում՝ ուշադրություն գրավելով Թրամփի և Ռյուտեի երկխոսությամբ։

Հիշեցնենք, որ ՆԱՏՕ-ի գագաթնաժողովի հիմնական թեմաներից մեկը դաշինքի անդամ երկրների պաշտպանական ծախսերի ավելացումն ու եվրոպական անվտանգության ամրապնդումն էր։