Մարգարիտա Սիմոնյանի դեմ մահափորձի գործով 12 մարդ դատապարտվել է մինչև 25 տարվա ազատազրկման

Արևմտյան երկրորդ շրջանի ռազմական դատարանը մեղավոր է ճանաչել RT-ի գլխավոր խմբագիր Մարգարիտա Սիմոնյանի դեմ մահափորձի գործով անցնող 12 անձի։ Այս մասին դատարանի դահլիճից հաղորդել է «Կոմերսանտի» թղթակիցը։

Գործի շրջանակում խմբի ղեկավարներ Միխայիլ Բալաշովը և Եգոր Սավելևը դատապարտվել են 25 և 15 տարվա ազատազրկման՝ խիստ ռեժիմի բանտում։ Մյուս մեղադրյալները ստացել են 6-ից 15 տարվա ազատազրկման պատիժներ։

Դատական նիստը անցկացվել է դռնփակ ռեժիմով՝ քանի որ մեղադրյալներից երեքը անչափահասներ են եղել։ Ըստ դատավճռի՝ նրանք մեղավոր են ճանաչվել ահաբեկչական կազմակերպությանը մասնակցելու, կողոպուտի և խուլիգանության մեջ։

Քննության տվյալներով՝ հանցախումբը «Պարագրաֆ-88» նեոնացիստական խմբավորման անդամներ են եղել և, ըստ հաղորդումների, հետևել են Մարգարիտա Սիմոնյանին և լրագրող Քսենիա Սոբչակին՝ պլանավորելով նրանց դեմ հանցագործություններ։

Հիշեցնենք՝ Մարգարիտա Սիմոնյանը նախկինում հայտարարել էր, որ իր դեմ երեք մահափորձ է իրականացվել կամ կանխվել, այդ թվում՝ անօդաչու թռչող սարքի կիրառմամբ։ Նրա խոսքով՝ ինքը մշտապես ստանում է սպառնալիքներ, սակայն այդ պայմաններում շարունակում է իր աշխատանքը՝ նշելով, որ «պատերազմը իր մասնագիտության մասն է»։