Ռաֆինյան չի կարողանա օգնել իր թիմին Շոտլանդիայի դեմ կայանալիք խաղում

Բրազիլիայի ազգային թիմի հարձակվողական ոճի կիսապաշտպան Ռաֆինյան վնասվածքի պատճառով չի մասնակցի Շոտլանդիայի ընտրանու դեմ կայանալիք առաջիկա հանդիպմանը։

ԱԱ-2026-ի խմբային փուլի C խմբի երրորդ տուրի շրջանակում հունիսի 25-ին կայանալիք խաղում Բրազիլիայի հավաքականին չի կարողանա օգնել վինգեր Ռաֆինյան։ Այս տեղեկությունը X-ի իր միկրոբլոգում հրապարակել է ճանաչված լրագրող և ինսայդեր Ֆաբրիցիո Ռոմանոն։

Հարավամերիկյան ընտրանու բժշկական անձնակազմի կատարած հետազոտության արդյունքներով ֆուտբոլիստի մոտ հայտնաբերվել է աջ ազդրի մկանային վնասվածք։ Ինչպես հայտնում է աղբյուրը, Ռաֆինյան կմնա ազգային թիմի տեղակայման վայրում և կանցնի ինտենսիվ բուժում։ Բրազիլացի խաղացողը կներդնի բոլոր ջանքերը, որպեսզի կարողանա վերականգնվել Մունդիալի հաջորդ փուլերին ընդառաջ։

Աշխարհի առաջնության խմբային փուլի երկրորդ տուրի՝ Հայիթիի դեմ հանդիպման (3:0) 40-րդ րոպեին Ռաֆինյան ստիպված է եղել լքել խաղադաշտը ստացած վնասվածքի պատճառով։ Մինչ փոխարինվելը բրազիլացին նստել էր խոտածածկին, ինչից հետո բուժանձնակազմը մտել էր խաղադաշտ՝ նրան առաջին օգնություն ցուցաբերելու համար։

Ֆուտբոլի 2026 թվականի Աշխարհի առաջնությունն ընթանում է ԱՄՆ-ում, Կանադայում և Մեքսիկայում՝ հունիսի 11-ից հուլիսի 19-ը։ Մրցաշարի գործող չեմպիոնը Արգենտինայի ընտրանին է, որը 2022 թվականի ԱԱ-ի դրամատիկ եզրափակիչում հետխաղյա 11-մետրանոց հարվածաշարով առավելության էր հասել Ֆրանսիայի նկատմամբ (հանդիպման հիմնական ու լրացուցիչ ժամանակն ավարտվել էր 3:3 հաշվով, իսկ պենալտիներով արգենտինացիները հաղթել էին 4:2 հաշվով)։