Ռոսսելխոզնադզորի ղեկավարի կտրուկ արձագանքը` Հայաստանի գործողություններին

Ռոսսելխոզնադզորի ղեկավար Սերգեյ Դանկվերտը «Վեստի»-ին տված հարցազրույցում Պետերբուրգի միջազգային տնտեսական համաժողովում բացատրել է Հայաստանից գյուղմթերքի մատակարարման խնդիրների պատճառները։ Նրա խոսքով՝ հանրապետության իշխանություններն ավելի շատ ուշադրություն են դարձնում ինտեգրացիոն նախագծերին, քան հրատապ հարցերի լուծմանը։

Դանկվերտը նշել է, որ Հայաստանի էկոնոմիկայի նախարարությունը փաստացի ստանձնել է գյուղատնտեսության նախարարության գործառույթները, սակայն պարենային անվտանգության մեկ ծառայությունն ի վիճակի չէ վերահսկել հազարավոր ֆերմերների աշխատանքը։ Արդյունքում չի հաջողվում ապահովել արտադրանքի անվտանգ և կայուն մատակարարումներ։

 «Մենք Հայաստանի վերաբերյալ ասում էինք, որ պետք է կառուցվածքային փոփոխություններ անել։ Բայց այն գործընկերները, ովքեր վերցրել են գյուղատնտեսության նախարարության լիազորությունները, մեզ հետ ընդհանրապես ոչ մի անգամ կապի դուրս չեն եկել», - ընդգծել է նա։ 

Ավելի վաղ Ռոսսելխոզնադզորն արդեն սահմանափակել էր Հայաստանից կարտոֆիլի, սմբուկի, մի շարք բանջարեղենների ու մրգերի, ալկոհոլային խմիչքների և ծաղիկների ներմուծումը։