ՍԱՏՄ-ից հայտնել են «Ջերմուկի» լաբորատոր փորձաքննության արդյունքները

Մենք «Ջերմուկից» նմուշառում ենք կատարել, լաբորատոր փորձաքննության արդյունքներում շեղումներ չեն հայտնաբերվել, հիդրոկարբոնատի, սուլֆատի, քլորի իոնների քանակը համապատասխանել է Մաքսային միության տեխնիկական կանոնակարգերով սահմանված նորմերին, Aysor.am-ի հետ զրույցում հայտնել է ՍԱՏՄ մամուլի խոսնակ Անուշ Հարությունյանը։

«Իսկ բուսաբուծական և ձկնաբուծական ձեռնարկություններում մայիսի 21-27-ը ռուս գործընկերների հետ համատեղ անցկացրած ստուգումների արդյունքները դեռևս չեն ամփոփվել։ Դրանք նույնպես կներկայացվեն ամփոփվելուց հետո», - ասել է Հարությունյանը։

Հիշեցնենք, որ «Ռոսպոտրեբնադզոր»-ը կարգադրել էր Ռուսաստանում կասեցնել «Ջերմուկ» հանքային ջրի 64,5 միլիոն շշի վաճառքը։

Ռոսսելխոզնադզորը նաև 2026 թվականի մայիսի 30-ից ժամանակավոր սահմանափակումներ է մտցնում Հայաստանից ծագող և Հայաստանից արտահանվող թարմ լոլիկի, վարունգի, պղպեղի, կանաչեղենի և ելակի ներմուծման վրա՝ մինչև արտահանվող արտադրանքի անվտանգության ապահովման համապատասխան մեխանիզմի մշակումը։