«Ինտելիգենտ ամուսնալուծության» ուղի. Օվերչուկի հայտարարությունը Հայաստանի վերաբերյալ

 Ոչ ոք չի ցանկանում, որ Հայաստանը դուրս գա Եվրասիական տնտեսական միությունից (ԵԱՏՄ)։ Երևանը նույնպես հայտարարում է նման մտադրության բացակայության մասին, նշել է ՌԴ փոխվարչապետ Ալեքսեյ Օվերչուկը։ 

«Գիտեք, իրավիճակը շատ տարօրինակ է, ոչ սովորական, որովհետև ոչ ոք չի ցանկանում, որ Հայաստանը դուրս գա ԵԱՏՄ-ից, և Հայաստանի ղեկավարներն էլ հայտարարում են, որ չեն ցանկանում դուրս գալ ԵԱՏՄ-ից», - ասել է նա «Վեստի»-ին։ 

Ինչպես ուշադրություն է հրավիրել Օվերչուկը, Ռուսաստանը կողմ է, որ Հայաստանը մնա միավորման մեջ և «ծաղկի ու հետագայում էլ զարգանա նույն տեմպերով, ինչպես դա անում էր վերջին տարիներին, քանի դեռ ԵԱՏՄ-ում էր»։ Մայիսի 9-ին Ռուսաստանի նախագահ Վլադիմիր Պուտինը հայտարարել էր, որ Երևանը պետք է հնարավորինս շուտ կողմնորոշվի ԵՄ-ին կամ ԵԱՏՄ-ին անդամակցության հարցում, այդ դեպքում հնարավոր է «ինտելիգենտ ամուսնալուծության» ուղին։ 

Հայաստանի խորհրդարանը 2025 թվականի մարտի 26-ին երկրորդ և վերջնական ընթերցման ընթացքում ընդունել է հանրապետության՝ Եվրոպական միությանը անդամակցելու գործընթացը սկսելու մասին օրենքը։ Հայաստանի վարչապետ Նիկոլ Փաշինյանը նշել էր, որ դա չի նշանակի Երևանի՝ համայնքին միանալու գործընթացի ավտոմատ մեկնարկ, քանի որ այդ հարցը պահանջում է հանրաքվեի անցկացում։ Ինչպես հայտարարել էր ՌԴ փոխվարչապետ Ալեքսեյ Օվերչուկը, Ռուսաստանն այդ գործողությունները դիտարկում է որպես հանրապետության՝ Եվրասիական տնտեսական միությունից դուրս գալու սկիզբ։ Նրա խոսքով՝ ԵՄ-ին անդամակցությունն անհամատեղելի է ԵԱՏՄ-ին երկրի անդամակցության հետ։