ՌԴ ԱԳՆ-ից կոշտ ուղերձ են հղել Երևանին՝ ԵԱՏՄ-ն ու ԵՄ-ն անհամատեղելի են

ՌԴ ԱԳ նախարարի տեղակալ Գալուզինը անընդունելի է անվանել Երևանի՝ ԵԱՏՄ անդամակցությունը ԵՄ ինտեգրման հետ համատեղելու փորձերը՝ հայտարարելով, որ «երկու հարսանիքում պարել չի ստացվի», և Փաշինյանին մեղադրել է հակառուսական արշավ սկսելու մեջ՝ տարածաշրջանում մոտեցող ընտրությունների ֆոնին։

Հայաստանը չի կարող միաժամանակ լինել և՛ ԵԱՏՄ-ում, և՛ ԵՄ-ում, «երկու հարսանիքում պարել չի ստացվի»․ հայտարարել է ՌԴ ԱԳ նախարարի տեղակալ Միխայիլ Գալուզինը՝ ՌԴ Անվտանգության խորհրդի՝ մերձավոր արտասահմանի երկրների հետ համագործակցության թեմայով հատուկ խմբի նիստից հետո։

ՌԴ նախագահ Վլադիմիր Պուտինը ապրիլի 1-ին Հայաստանի վարչապետ Նիկոլ Փաշինյանի հետ բանակցությունների ընթացքում նշել էր, որ միաժամանակ Եվրամիության և ԵԱՏՄ մաքսային միություններում գտնվելը սկզբունքորեն անհնար է։