ԱՄՆ-ն կրկին մերժեց Իրանին

Միացյալ Նահանգների իշխանություններն ամբողջությամբ մերժել են հակամարտության կարգավորման նպատակով Իրանի ներկայացրած 14 կետից բաղկացած ծրագիրը։

Tehran Times պարբերականի փոխանցմամբ՝ Թեհրանն արդեն ստացել է Վաշինգտոնի գրավոր պատասխանը սեփական առաջարկների վերաբերյալ։ ԱՄՆ-ն մերժել է իրանական կողմի բոլոր կետերը՝ շարունակելով հավատարիմ մնալ ճնշումների քաղաքականությանը, որը հատկապես վերաբերում է Իրանի միջուկային ծրագրին։

Ըստ Tehran Times-ի՝ Իրանը պատրաստակամություն է հայտնել անցնել բանակցությունների երկրորդ փուլին, եթե Վաշինգտոնն ընդունի ներկայացված առաջարկները։

Հիշեցնենք, որ մայիսի 10-ին Իրանը Պակիստանի միջոցով փոխանցել էր Պարսից ծոցում հակամարտության կարգավորման վերաբերյալ ԱՄՆ առաջարկների պատասխանը։ «The Wall Street Journal»-ը, հղում անելով իր աղբյուրներին, նշել էր, որ Թեհրանը դեմ է արտահայտվել միջուկային օբյեկտների ապամոնտաժմանը, ինչը Վաշինգտոնի հիմնական պահանջն է։ Թեև Իրանը համաձայնել է դադարեցնել ուրանի հարստացումը, սակայն ոչ ԱՄՆ-ի պահանջած 20 տարի ժամկետով։ Հետագայում ԱՄՆ նախագահ Դոնալդ Թրամփն անընդունելի էր համարել Թեհրանի տված պատասխանը։