Հայաստանում մսի վաճառքի կետերում ստուգումներն ավելացել են
Հայաստանում մսի վաճառքի կետերում իրականացված ստուգումների թիվը աճել է, իսկ խախտումների քանակը՝ նվազել։ Այս մասին լրագրողների հետ հանդիպման ընթացքում հայտնել է ՀՀ Սննդամթերքի անվտանգության տեսչական մարմնի ղեկավար Տիգրան Պետրոսյանը՝ ներկայացնելով 2025 թվականի արդյունքները։
Նրա խոսքով՝ «2025թ․ իրականացվել է 5 301 համաճարակաբանական մոնիթորինգային այց, որոնցից 4 515-ը՝ մսի իրացման կետերում, 786-ը՝ սպանդանոցներում, անասնապահական ֆերմաներում եւ կաթի ընդունման կետերում»։
Պետրոսյանը խախտումների նվազումը պայմանավորել է տեսչական մարմնի արդյունավետ գործունեությամբ։
«Մոնիթորինգը եւ վերահսկողությունը շարունակական կլինեն»,- ընդգծել է նա։
Նշվել է, որ 2025 թվականին հայտնաբերվել է 314 խախտում, որոնցից 265 դեպքերում տնտեսվարող սուբյեկտները ենթարկվել են վարչական տույժերի։
Մսի իրացման կետերում արձանագրված խախտումների արդյունքում առգրավվել և ոչնչացվել է գրեթե 8 տոննա միս։ Անդրադառնալով սպանդանոցներին՝ Պետրոսյանը նշել է, որ 2024 թվականին դրանց թիվը եղել է 139, իսկ 2025 թվականին՝ 128։
«Չնայած սպանդանոցների թվի կրճատմանը, փաստացի մորթվել է 31 հազար տոննա, ինչը նախորդ տարիների համեմատ ավելի բարձր է»,- նշել է պաշտոնյան։
