Շրջակա միջավայրի նախարարը` COP17-ին Ադրբեջանի Ադրբեջանի մասնակցության մասին
COP17-ի անդամ երկրները 196-ն են, և հրավիրող կողմը ոչ միայն Հայաստանն է, այլև ՄԱԿ-ը։ Հայաստանը միջոցառումը ոչ միայն հյուրընկալում է, այլև նախագահում է այն։ Այդ մասին տարեկան ամփոփիչ ասուլիսի ընթացքում հայտնել է շրջակա միջավայրի նախարար Համբարձում Մաթևոսյանը՝ պատասխանելով հարցին, թե արդյոք Ադրբեջանի ներկայացուցիչներ կմասնակցեն միջոցառմանը։
Նրա խոսքով՝ սա միայն Հայաստանի միջոցառումը չէ, այլ համաշխարհային հարթակ է։ Նախարարը նշել է, որ բոլոր երկրները տեղեկացված են միջոցառման օրերի և կազմակերպչական գործընթացների վերաբերյալ։ Պաշտոնական հրավերները դեռ չեն ուղարկվել, սակայն առաջիկայում դրանք կուղարկվեն՝ համատեղ ՄԱԿ-ի հետ։
Մաթևոսյանը հայտնել է, որ բոլոր երկրների շրջակա միջավայրի նախարարությունները կամ համապատասխան լիազոր մարմինները արդեն իրազեկված են, և ակնկալվում է բարձրաստիճան պաշտոնյաների ու նախարարների մեծ մասնակցություն։ Միևնույն ժամանակ, դեռ վաղ է հստակ նշել, թե որ երկրները կհաստատեն մասնակցությունը։
Նախարարը ընդգծել է, որ միջոցառման նպատակներից մեկն ընդհանուր բնապահպանական խնդիրների շուրջ համատեղ աշխատանքն է, և այդ գործընթացից որևէ երկրի դուրս թողնել հնարավոր չէ։ Նա հավելել է, որ Հայաստանը պատրաստ է հյուրընկալել բոլոր պատվիրակություններին և բոլոր երկրներին։
Հիշեցնենք, որ Կենսաբազմազանության COP17 համաժողովը Երևանում կանցկացվի 2026 թվականի հոկտեմբերին։
