Ֆիլիպիններում լաստանավ է խորտակվել․ զոհվել է 15 մարդ
Ֆիլիպինյան լաստանավի աղետի հետևանքով զոհերի թիվը հասել է 15-ի, հաղորդում է Wion TV-ն՝ հղում անելով Ֆիլիպինների իշխանություններին։
«Trisha Kerstin 3» ուղևորատար և բեռնատար լաստանավը խորտակվել է երեկ գիշեր Բասիլան նահանգի ափերից մոտ մեկ ծովային մղոն հեռավորության վրա՝ Զամբոանգա քաղաքից դեպի Սուլու նահանգի Ջոլո կղզի ուղևորվելիս։ Ֆիլիպինների ափային պահպանությունը հայտնել է, որ նավի վրա եղել են 332 ուղևոր և 27 անձնակազմի անդամ, երբ այն, ըստ երևույթին, տեխնիկական խնդիրներ է ունեցել և խորտակվել է լավ եղանակին։
Նախկինում հաղորդվել էր միջադեպի հետևանքով տասներեք մահվան մասին։
«Պաշտոնյաների տվյալներով՝ մինչ այժմ փրկվել է առնվազն 316 մարդ, և շարունակվում են որոնողական աշխատանքները հնարավոր անհետ կորած ուղևորների համար», - հաղորդել է հեռուստաալիքը։
Բասիլանի ափերի մոտ որոնողական-փրկարարական գործողությանը մասնակցել են ափային պահպանության և ռազմածովային ուժերի նավեր, դիտարկման ինքնաթիռ, Ֆիլիպինների ռազմաօդային ուժերի «Black Hawk» ուղղաթիռ և տեղական ձկնորսական նավեր։
