ԱՄՆ-ում ավելի քան 8000 չվերթ է չեղարկվել ձնաբքի պատճառով. 140 միլիոն մարդ նախազգուշացում է ստացել

Հզոր բուքի պատճառով ԱՄՆ ողջ տարածքում չեղարկվել է հանգստյան օրերին նախատեսված ավելի քան 8000 ավիաչվերթ, հայտնում է Associated Press-ը։ Ակնկալվում է, որ վատ եղանակը վնաս կհասցնի երկրի մեծ մասին՝ սպառնալով մի քանի օրով հոսանքազրկել բնակավայրերն ու փակել հիմնական ճանապարհները։

Նյու Մեքսիկոյից մինչև Նոր Անգլիա ընկած տարածքում մոտ 140 միլիոն մարդ փոթորկի մասին նախազգուշացում է ստացել։ Ազգային օդերևութաբանական ծառայությունը կանխատեսում է համատարած առատ ձյուն և աղետալի մերկասառույցի շերտ, որը ձգվում է արևելյան Տեխասից մինչև Հյուսիսային Կարոլինա։ Օդերևութաբաններն ասում են, որ վնասը, հատկապես սառցապատ շրջաններում, կարող է համեմատելի լինել փոթորկի պատճառած վնասի հետ։

Ուրբաթ երեկոյան փոթորկի ճակատը Տեխասի որոշ շրջաններում բերել է սառցե անձրև և թաց ձյուն, իսկ Օկլահոմայում տեղացել է ձյուն ու թաց ձյուն։ Կանխատեսվում է, որ հարավային շրջաններով անցնելուց հետո փոթորիկը կտեղափոխվի հյուսիս-արևելք՝ Վաշինգտոնից մինչև Նյու Յորք և Բոստոն բերելով մոտ 30 սանտիմետր ձյուն։

Ավելի քան մեկ տասնյակ նահանգների նահանգապետեր ահազանգել են սպասվող վատ եղանակի վերաբերյալ՝ հայտարարելով արտակարգ դրություն կամ հորդորելով մարդկանց մնալ տանը։